SIMUNJAN : Program Roadshow Agenda Nasional Malaysia Sihat (ANMS) Renggat Pelilih Simunjan ke diatur ba Dewan Mesra Simunjan nerima timbal manah ari mayuh serak komuniti. 

Kaban Parlimen Batang Sadong, Rodiyah Sapiee madah, Agenda Nasional Malaysia Sihat nya siti pakej pengelantang pengerai ke udah dikelala perintah nengah Opis Menteri Pengerai nyadi penyungkak besai, sereta disukung Opis Pengawa Berumah enggau Perintah Lokal. 

“Batang tuju ANMS dikena narak pengidup ti bepengerai sereta nentuka rampa menua ti nyukung pengerai rayat Madani Malaysia ba pengawa deka nempa rayat Malaysia bepengerai sereta lantang sepanjai umur sida," ku iya.

Iya madah munyi nya maya bejadika program nya kena Hari Enam. 

Rodiyah mega ngarapka nengah program Agenda Nasional Malaysia Sihat, komuniti ditu ulih narak pengidup bepengerai ngereja aktiviti fizikal, makai pemakai nengah chara pengerai, nyaga pengerai runding sereta nyaga pengerai ke diri empu. 

Iya meransang peranak Simunjan enggau komuniti ari pelilih bukai semampai ngemeran pengidup bepengerai enggau ngereja aktiviti fizikal, makai pemakai ti manah ke pengerai, sereta semampai nyaga pengerai runding dikena negap sereta ngelindung tubuh ari sebarang igi penyakit.

Berebak enggau nya, Rodiyah mega udah bejadika pengawa Kit Cara Penyusuan Ibu dikena nyendiaka bemacham pelasar ba pengawa bekunsika penemu pasal nusu ke anak ngagai bala indai beserimbai enggau Minggu Penyusuan Ibu Sedunya ti diintu kena 1 ngagai 7 Ogos ninting taun.

Pengerami tu ngembuan tuju deka meri penerang, netapka juluk, meransang sereta ngaul diri dalam pengawa nyaga sereta nyukung pengawa nusuka anak enggau rambai jaku ‘#Rapatkan Jurang: Sokong Susu Ibu Sepenuhnya’ ti ngemeratka chara ngidupka diri, bepengerai enggau pengelantang. 

Dulu ari nya, Rodiyah begulai enggau Kaban Kunsil Nengeri (ADUN) Simunjan, Awla Dris udah  ‘flag off’ ungkup program Jalai Nuju Pengerai ANMS enggau ke bukai. 

Sama bisi datai maya nya, Pegawai Pengerai Pelilih Simunjan Dr Joshua Peterson Peter Legi, Tuai Pampang Pengawa Promosyen Pengerai, Opis Pengerai Nengeri Sarawak Lilis Suriani Razali, Sekretari Kaunsil Pelilih Simunjan Mohd Rizal Zakaria, Penulung Pegawai Opis Pelilih Simunjan Mohd. Raili Jawawi enggau Chairman Panel Penyanding Penemu Klinik Pengerai Indai enggau Anak Simunjan  Bandar Sapian Dubli. -EDISI UKAS