KUCHING: Opis Menteri Nembiak, Lumba enggau Pemansang Orang Dagang (MYSED) deka ngatur aum begulai enggau Opis Menteri Nembiak enggau Lumba (KBS), 30 April tu.
Dato Sri Abdul Karim Rahman Hamzah madah, aum nya deka diatur Chariman pengawa nya empu, Hannah Yeoh ke mega Menteri Nembiak enggau Lumba lalu digulu pengari ari selampur Malaysia.
“Ba aum nya ila, kami deka ngerintaika pekara enti sema bisi penanggul. Opis Nembiak enggau Lumba (KBS) mega lalu ngerintaika pekara baka belanja enggau pekara ke bukai,” ku iya.
Iya nerangka pekara nya maya dirandau raban media pengudah tembu ngabang ngagai Pengerami Nerima Pengabang Hari Raya Aidilfitri 2024 ke diatur Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba Palan Konvensyen Borneo Kuching (BCCK), kemari.
Berebak enggau nya, Dato Sri Abdul Karim mega madah, iya nyamin Lumba Malaysia (SUKMA) 2024 maya Ogos tu ila semampai disikap enggau manah ari tiap pelilih menua ti enggau ngulu ba pekit nya ila.
Nangkan nya, iya ke mega Menteri Dagang Temuai, Industri Kreatif enggau Seni Pemerindang Sarawak ngelalau raban atlit semampai nyikap diri enggau bejimat maya belatih ngambi ulih nyeliah diri sida ba sebarang penanggul.
“Ku arap atlit bukai mega bejimat awak sida enda bakal maya belatih,” ku iya.
Kebuah pia laban siku atlit lumba engsikal ari Kontijen Sarawak bakal ba kuyu enggau patah tulang selangkar maya iya belatih.
Ba pekit lumba besai tu ila, Sarawak ngarapka KBS ulih meri agih belanja ti chukup dikena mantu nengeri tu. - EDISI UKAS
