KUCHING: Pengerami Nerima Pengabang Aidilfitri Tuai Pemegai Menua Nengeri Sarawak, Tun Pehin Sri Dr. Wan Junaidi Tuanku Jaafar sereta bini, Toh Puan Fauziah Mohd Sanusi chukup richah enggau penatai mensia mayuh di Astana Nengeri Sarawak, sehari tu.
Bala pengabang datai mega ulih berandau enggau Tun Pehin Sri Dr. Wan Junaidi sereta Toh Puan Fauziah.
Pengerami nya mega digulu Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau bini, Puan Sri Datuk Amar Juma’ani Tuanku Bujang.
Tun Pehin Sri Dr Wan Junaidi enggau Toh Puan mega nerima pengabang ari bala Menteri Kabinet, Kaban Parlimen, Kaban Kunsil Nengeri, Tuai Opis Perintah enggau temuai dipebasa bukai sereta pengari ari sektor peribit enggau mensia mayuh.
Sama bela datai, tiga Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof. Dr Sim Kui Hian, Sapit Menteri Besai Dato’ Sri Fadillah Yusof, Menteri Pemansang Indu, Ruang Bilik enggau Komuniti Dato’ Sri Nancy Shukri, Menteri Kereja Raya, Dato Sri Alexander Nanta Linggi, Menteri Dagang Temuai, Seni Pemerindang Enggau Budaya Dato’ Sri Tiong King Sing sereta temuai dipebasa ke bukai.
Pengerami nya udah diatur ba Dewan Besai Astana Nengeri berengkah ari pukul 9 pagi ngagai 4.30 lemai.
Bala pengabang dinah bemacham bansa pemakai enggau kue Hari Raya.
Nangkan nya, Tun Pehin Sri Dr Wan Junaidi enggau Toh Puan mega ngabang ngagai Pengerami Nerima Pengabang Aidilfitri Premier Sarawak muak ke lemai hari ba Palan Konvensyen Borneo Kuching (BCCK).
Pengerami nya mega richah enggau penatai Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Pengangkut Sarawak Dato Sri Lee Kim Shin, Menteri Pemansang Orang Indu, Nembiak Mit enggau Komuniti, Dato Sri Fatimah Abdullah, Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn, Menteri Pemakai, Komoditi enggau Pemansang Wilayah, Dato' Sri Dr Stephen Rundi Utom, Speaker Kunsil Nengeri (DUN) Tan Sri Datuk Amar Mohamad Asfia Awang Nassar, Sekretari Perintah Sarawak Datuk Amar Mohamad Abu Bakar Marzuki sereta temuai dipebasa ke bukai. - EDISI UKAS
