Konsep Segulai Sejalai Nipak Semangat Beserakup Sarawak
Disiarkan pada 07 Aug 2024
Sumber Berita: UKAS
LUNDU: Konsep Segulai Sejalai nipak penyerakup dalam pengelain bansa enggau jalai pengarap kelebih agi ba rayat Sarawak.
Kaban Kunsil Nengeri (ADUN) Opar Billy Sujang madah, menua Sarawak nyadi chunto dalam Malaysia ari sukut penyerakup pupu bansa.
“Ulah bebatak asur enggau begulai tu deka terus nyadi tulang belakang atur gawa Perintah Sarawak ke diatu kelimpah nyulur legasi penyerakup rebak dudi.
“Program diatur baka tu ukai semina ari Opis Pemadah Nengeri Sarawak aja tang mega ngaul agensi ke bukai sepemanjai bulan serimbai Hari Kebangsaan enggau Hari Malaysia ulih ngemauka agi semangat penaluk enggau nasionalisme kelebih agi ngagai peranak Lundu,” ku iya.
Iya madah munyi nya maya Pengawa Bejadika Program Kembara Merdeka Jalur Gemilang 2024 Pelilih Lundu di Kampung Biawak, kena Hari Dua tu tadi.
Nangkan nya, Billy mega meransang peranak pelilih Lundu bela ngitau tambai Jalur Gemilang ba genap premis perintah, peribit tauka ba rumah kediri nyukung kedaulatan menua kitai.
Dipelaba bisi 30 entukar ke udah ngulu konvoi serimbai Program Kembara Merdeka Jalur Gemilang 2024 Pelilih Lundu mupuk ari Opis Pelilih Lundu ngelawa Pasar Sematan, Telok Melano, Tugu Peringatan Kampung Jangkar lalu tembu ba Balai Mayuh Guna Kampung Biawak ungkup pengawa bejadika program.
Sama bisi datai pengari ADUN Tanjong Datu Abang Abdul Aziz Abang Draup, Direktor Opis Pemadah Nengeri Sarawak Helmy Hamid, Penulung Pegawai Pelilih Lundu Zulkipli Morshidi, Pegawai Tadbir Sarawak Pelilih Mit Sematan Mohd Ameerullah Roslan enggau Pemancha Allen Manium. -EDISI UKAS
