KUCHING: Pengerami Nerima Pengabang Hari Raya Aidilfitri Premier Sarawak richah enggau penatai 5,000 pengabang ba Palan Konvensyen Borneo Kuching (BCCK) pagi tadi.
Pengerami nya richah enggau penatai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg empu enggau bini iya, Puan Sri Datuk Amar Juma’ani Tun Tuanku Bujang.
Sama ngulu pengerami nya Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan, Sekretari Perintah Sarawak, Datuk Amar Mohammad Abu Bakar Marzuki enggau bala Menteri Kabinet Nengeri ke bukai.
Bala pengabang ke datai enggau ngerichah pengerami nya nadai ngira bansa tauka jalai pengarap udah berengkah berintai kenyau ari pukul 9 pagi tadi.
Pengerami ba BCCK nya mega negapka agi kaul mensia mayuh lebuh sida sama berami ngintu Hari Raya ba awak nya.
Pengelikun sida mega dijaga enggau manah ari raban ke udah ngatur pengerami nya.
Pengerami Nerima Pengabang Aidilfitri Premier Sarawak nya mega nyadi nalan negutka kaul entara ruang bilik mensia mayuh di Sarawak.-EDISI UKAS
