BETONG: Pengelandik nguasa Jaku English ba renggat sekula ulih nyadi pugu pemujur ba pelajar.
Sapit Menteri Nembiak, Lumba enggau Pemansang Orang Dagang Sarawak, Dato Gerald Rentap Jabu madah, pengelandik nguasa Jaku English mega ulih nempa nembiak nyulut ba pelajar Sains, Teknologi, Injiniring enggau Matematik (STEM).
“Tu mega ulih mantu Perintah Sarawak ngalih ngagai ekonomi baru baka ekonomi hidrogen enggau chara nyimpan karbon ari pemintar runding nembiak rebak baru diatu.
Iya nerangka pekara nya lebuh bejadika Pengerami Makai Lemai PIBG Sekula Primari (SK) Nanga Ajau, Betong Taun 2024 ba Balai Makai SK Nanga Ajau, Betong ditu.
Ku iya, nembiak rebak baru di Betong diatu mega ulih nampung pelajar sida ngagai tikas ti tinggi agi maya Sarawak meri pelajar pechuma ari perintah nengeri ba 2026 ila.
Iya mega meri puji ngagai Kepala Pelajar enggau pelajar sekula nya laban udah nyulut ba pelajar sida lalu nampung pelajar sida ngagai MRSM Betong enggau ba Sekula Antarabansa Yayasan Sarawak.
“Ari nya, tu nunjukka sekula menua pesisir mega ulih mansang ba pelajar baka sekula ke bukai,” ku iya.
Berebak enggau nya, Kaban Kunsil Nengeri (ADUN) Layar nya mega udah ngungkupka belanja RM20,000 dikena sida ngatur aktiviti robotik di SK Nanga Ajau, Betong.
Dulu ari nya, Kaban Parlimen Betong Dr Richard Rapu mega ngelalau apai indai enggau nembiak pelajar ba sitak nya semampai beratika pekara pelajar.
Iya mega madah, penyulut ba pelajar ukai semina ulih nulung kitai ari sukut begigaka pengawa tang mega ulih nulung kitai nyulut ba pengidup enda ngira penemu dipelajar.
Maya nya mega, iya meri agih belanja sepenyampau RM5000 ngagai sida PIBG SK Nanga Ajau dikena sida ngatur aktiviti sida ke bukai. - EDISI UKAS
