SUKMA XXI: Semua Komiti Kereja Bagi Menua Sibu Patut Nyikap Diri
Disiarkan pada 04 Aug 2024
Sumber Berita: UKAS
SIBU: Bisi 20 Komiti Kereja Lumba Malaysia (SUKMA) XXI Sarawak 2024 Bagi Menua Sibu diperansang bejalaika tanggungpengawa enggau manah ngambi semua ulih bejalai enggau lanchar lebuh pengawa lumba dua taun sekali kena 17 nyentuk 24 Ogos tu ila.
Sapit Sekretari Perintah Sarawak (Operasyen) ke mega Tuai Pegawai Eksekutif (CEO) SUKMA XXI 2024, Datu Hii Chang Kee madah, menua Sibu deka nyadi tuai rumah ungkup tiga main iya nya main bol lelaki, bola tampar dewan enggau badminton.
Ku iya madah, beteda 13 hari da agi sebedau SUKMA berengkah, semua pengawa nyikap diri ari sukut nyendia palan pekit, palan endur diau bala atlit enggau pegawai sereta ke bukai.
Iya madah munyi nya maya ngetuai ke Aum Khas Komiti Kereja SUKMA XXI 2024 Bagi Menua Sibu di Bilik Aum Opis Residen Pelilih Sibu, kena Hari Minggu.
Sama bisi datai maya nya Residen Bagi Menua Sibu Abang Mohamad Porkan Abang Budiman, raban Sekretariat SUKMA XXI Sarawak 2024 sereta bala pengari ari 20 Komiti Kereja ke bukai.
Ungkup Bagi Menua Sibu, bisi 940 atlit nyengkaum jurulatih, pegawai teknikal enggau raban PDRM maya lumba tu ila.
Nangkan nya, main badminton deka diatur ba Stadium Tetutup Sibu, bola tampar dewan di Dewan Bola Tampar Rejang Park Sibu enggau main bol lelaki di Stadium Tun Ahmad Zaidi enggau Palan Lumba Komuniti Azman Hashim Sibu. – EDISI UKAS
