Sarawak Nyaup Sebagi Ari Belanja Ngemansang Adan Menua
Disiarkan pada 04 Aug 2024
Sumber Berita: UKAS
KUCHING: Perintah Sarawak sedia bekerejasama enggau Perintah Besai meri agih belanja dikena ngemansangka adan menua wilayah tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Perintah Besai udah ngemendarka agih belanja sepenyampau RM1 bilion dikena ngemansangka semua adan menua entara Malaysia enggau Indonesia ke ngaul dua nengeri iya nya Sabah enggau Sarawak.
Taja pia ku iya, agih belanja ke dikemendar nya dipeda enda chukup kelebih agi lebuh dikena ngemansangka selampur adan menua.
Berindik ari nya, Datuk Patinggi Abang Zohari setuju nyaup melanja sebagi ari belanja nya lalu setengah da deka dipelanja Perintah Besai.
"Ba sepiak garis entara menua Malaysia, kami ari Perintah Sarawak agi ulih setuju bisi kerejasama 'one-to-one' enggau Perintah Besai ke alai kami ulih nyaup setengah ari belanja dikena ngerumban pemansang ba adan menua kami," ku iya.
Iya bejaku munyi nya lebuh dirandau pemberita pengudah ngulu Pengawa Ngelancharka Bup Biografi Gabenor Keterubah Sarawak Tun Openg Di Hikmah Exchange, kena Hari Minggu.
Ngenang silik pasal agih belanja RM1 bilion nya, Premier Sarawak meri jamin deka ngena dulu agi belanja nya ungkup pemansang di adan menua Tebedu enggau Entikong.
Dulu ari tu, Sapit Menteri Besai, Dato Sri Fadillah Yusuf ngemendarka agih belanja nya dikena nyeleti fasiliti di adan menua nyengkaum Kompleks Kastam, Imigresyen, Kuarantin enggau Pengelikun (Ciqs) Tebedu, Ba’Kalalan, Biawak enggau Tapak Megah di Kapit.
Berebak enggau nya, Datuk Patinggi Abang Zohari mega madah ke Perintah Sarawak ulih numbuhka sebuah genturung industri di Tebedu ngena agih belanja ke dipelanja Perintah Sarawak.
"Kitai mega bisi siti nalan industri ba sepiak Tebedu ke alai kitai ulih ngemansangka kandang menua nya nengah chara beranakka puku ba dia," ku iya nerang enggau silik agi.
Ngenang pasal pengawa ngelancharka bup nya, Datuk Patinggi Abang Zohari madah ke Niang Tun Datuk Abang Openg ukai semina apai iya aja tang meda niang nya nyadi mentor ke nempa gaya pendiau iya ke diatu ke meri perati ngagai nilai integriti lebuh gawa.
Sama datai tiga Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr Sim Kui Hian, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, Sekretari Perintah Sarawak Datuk Amar Mohamad Abu Bakar Marzuki, Bala Sapit Menteri, Luyar Besai Sarawak Datu Saferi Ali, Sapit Sekretari Perintah Sarawak (Perambu Ekonomi enggau Pemansang) Datu Dr Abdullah Zaidel sereta bala temuai dipebasa ke bukai.-EDISI UKAS
