Datuk Francis Ngabas Taba Projek Di Simanggang
Disiarkan pada 04 Aug 2024
Sumber Berita: UKAS
SIMANGGANG: Sapit Menteri Pelajar, Inovasyen enggau Pemansang Pengelandik Datuk Francis Harden Hollis udah ngabas sekeda taba projek, kena Hari Enam tu tadi.
Kaban Kunsil Nengeri (ADUN) Simanggang nya udah ngabas taba projek gelanggng futsal di Taman Harmoni Sri Aman ke disadang tembu tumu ari timpuh berindik ari gaya fizikal projek nya udah datai ba renggat kepenudi lalu hari bulan tembu ke udah ditetapka iya nya 21 Disember 2024.
Taba kedua iya nya projek nyeleti gelanggang futsal di Kampung Muhibbah ke udah tembu lalu semina nganti pengawa nyerah ngagai raban ke megai tanggungpengawa aja.
Nangkan nya, taba ke bukai iya nya projek jematan baru ke ngelayang Sungai Undop di Kampung Beleti ba baruh Agensi Pemansang Sri Aman (SADA) lalu Opis Kereja Raya (JKR) Bagi Menua Sri Aman nyadi agensi pengatur pengawa.
Projek sepemanjai 70 meter enggau 4 meter pemesai ti beungkus RM402 juta digaga dalam timpuh 12 bulan, berengkah 12 Januari 2024 nyentuk 11 Januari 2025.
Berebak enggau nya, Datuk Francis mega bisi ngulu program beripai ke diatur Raban Nembiak Parti Sa’ati Rayat Sarawak (SUPP) di Kampung Temudok Baroh ditu.
Program beripai nya mensiang jalai nuju Program Rumah Rayat Seranta (PPRT) nyadi tanggungpengawa rama parti ngagai rayat ti begunaka bantu mandangka pengelurus ati bala kaban parti gawa kelimpah nyaga pemeresi rampa menua. - EDISI UKAS
