KUCHING: Rayat Sarawak dipinta semampai ngenang sida ti bepenatai pemisi mit maya richah nyambut Aidilfitri taun tu.
Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar mega mai rayat mayuh bela mengkang ngenang nembiak patu balu, orang tuai, orang timpang pendiau (OKU) enggau rayat Palestin di Gaza ke benung betapi enggau penguji pengidup.
"Maya kitai rindu, gaga nyambut Aidilfitri, anang enda ingat sida ti benung ditinggang penusah.
"Aram kitai sama besampi ngarapka penusah sida jampat datai ba pengujung," ku iya madah beserimbai Hari Raya Aidilfitri 2024, Hari Dua.
Kelimpah ari nya, Tun Pehin Sri Dr. Wan Junaidi mega nyukung pegai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti ngaga pemutus pelajar enda bebayar ba semua Palan Pelajar Tinggi Perintah (IPTA) Sarawak.
"Pengawa ke digaga perintah Sarawak nyungkak pekara pelajar tu endang siti pemutus ti engkeman," ku iya madah baru.
Berebak enggau nya, iya enggau bini Toh Puan Fauziah Mohd Sanusi sereta sida sebilik meri Selamat Hari Raya Aidilfitri ngagai semua raban Islam di Sarawak. -EDISI UKAS
