KUCHING: Rayat pupu bansa enggau jalai pengarap dibai besaup ngetan sereta nentuka pengelantang pengidup mengkang dikembuan menua Sarawak.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pekara nya nyadi pugu pengering mai Sarawak nyadi menua ti likun.
"Ba kitai rayat Sarawak ti datai ari mayuh pupu bansa enggau jalai pengarap, endang ari menya Hari Raya Aidilfitri disambut semua kitai lalu dirami enggau pengawa ngabang ngagai pangan diri baka maya Tahun Baru China, Gawai Dayak, Krismas tauka Deepavali.
"Aram semua kitai bela besampika pengelantang pengidup semampai dikembuan kitai di Bumi Kenyalang tu ke nyadi pengering mai Sarawak nyadi menua lantang sereta likun," ku iya madah.
Iya bejaku munyi nya beserimbai Hari Raya Aidilfitri, Hari Dua.
Datuk Patinggi Abang Zohari mega madah, pengawa raban Islam puasa sepemanjai bulan Ramadan ukai semina ngetatka diri lapar tauka aus tang sida ngelaban pengingin diri seraya nerenak ulah siru ngagai raban ti kurang benasit manah. -EDISI UKAS
