KUCHING: Sarawak Palan Kuasa Ulih Dikena Baru Asia tauka 'Sarawak-Asia’s Renewable Powerhouse' siti rambai jaku ngangkatka nama Bumi Kenyalang datai ba tikas global.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif nuju pemeruan ba macham sukut nya seriris enggau 17 Tuju Pemansang Meruan (SDG) diatur 'United Nations'.
Ku iya, iya andal rambai jaku nya ulih mai Sarawak datai ba tikas rantau enggau global nyadi hab pemansut kuasa ulih dikena baru kelimpah nyadi hab inisiatif pengawa ngena kuasa nadai karbon enggau ngurangka karbon nyerumba tuju dunya ngelawa 'net-zero' manggai taun 2050.
"Kitai mega bisi pengelebih ngasilka 20 Gigawatt (GW) ari kuasa hidro kelimpah naka ke diatu ngembuan 5.4 GM ti ulih nentuka Sarawak bisi kuasa mimit karbon enggau tarif ti kompetitif ba pemeranak puku.
"Juluk ati Sarawak nangkan tu iya nya deka eksport kuasa ngagai Brunei enggau Sabah sereta nyendiaka kuasa 1 GW ke Singapura ba taun 2032 ila nengah kabel dalam tasik ti ngembuan 700 kilometer pemanjai kelimpah 190 Megawatt ke udah bisi ngagai Kalimantan Barat.
"Naka ke diatu, Sarawak Energy (SEB) benung ngaduka bekal kuasa nyentuk 10 GW tauka 10,000 MW dikena ba taun 2030 ila ngena hidro enggau turbin gas," pia ku iya madah beserimbai Hari Raya Aidilfitri 2024, Hari Dua.
Nambahka jaku iya, Premier Sarawak madah, nengeri tu deka majak ngerembaika pengulih pun kuasa hidro ti ngemeranka pengelikun rampa menua enggau pengidup mensia.
"Aku udah minta agensi bekaul mansik chara ngulihka kuasa ari tekat ai baka ke dikena di menua Norway enggau Kanada. Lalu projek tu deka berengkah digaga kitai di Sungai Gat, Baleh, Kapit bepun ari pemendar rayat dia," ku iya sambil madahka Sarawak besedia meri servis enggau mantu rantau tu bejadika tuju 'net-zero' ba taun 2050.
Ba pekara bukai, Datuk Patinggi Abang Zohari madah, Sarawak ke nyadi ekonomi dagang ba endur ti strategik di rantau Asia bela ngembuan pengelantang ke manah dudi hari dikena numbuhka ekonomi bepelasar pemansang penyangkai kapal betikas dunya.
Ku iya, pemutus mulaika baru Penyangkai Kapal Bintulu ngagai Sarawak patut dipeda ari sukut pelin baru ngubah tikas ekonomi Sarawak.
"Ba tuju matak pemeranak puku, kitai mega meseti bisi perengka guna tauka infrastruktur nyengkaum bekaul penyangkai kapal ti chukup.
"Ngelama tu kitai empai tepedaka pemansang penyangkai kapal enggau silik agi ke ulih nyadi batang pemun ngagai ekonomi Sarawak," ku iya madah baru. -EDISI UKAS
