KUCHING: Pengawa ngadu manah infrastruktur ba Taman Gua Niah diatu benung digaga.

Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, tu nyengkaum pengawa ngaga perengka guna ba Pasar Niah ngambika bisi dikena temuai ke datai dia.

"Tu digaga ngambika temuai lantang agi datai ngelawa Gua Niah.

"Kitai mega merambu deka ngaga jalai 'buggy' sereta ke bukai dikena temuai ke rindu nemuai ngagai endur nya.

"Ba Pasar Niah deka digagaka 'chalet'. Tu semua ba perambu kitai, enti enda salah, belanja semua tu bepuluh juta mega," ku iya madah.

Iya nerangka pekara nya ba aum media udah Aum Kaunsil Pengawa Ngemunas Dadah (MTMD) ditu, Hari Dua tu tadi.

Bekaul pemutus Arkeologi Dunya Gerempung Pelajar, Saintifik enggau Main Asal Pertubuhan Bangsa-Bangsa Bersatu (UNESCO) meri pengelala empai lama tu tadi, iya madahka berasai temegah ati senentang pekara nya dikena ngelakuka agi Kompleks Gua Taman Negara Niah nyadi siti ari produk dagang temuai.

"Empas ari pemutus tu chukup besai, lebih agi ba pekara bekaul dagang temuai laban Gua Niah tebilang enggau pengawa mansik raban bepengelandik nyengkaum datai ari Universiti New South Wales. 

"Kitai bisi dipadahka 'Human Habitation' di Gua Niah baru beumur 40,000 taun tang penerang pemadu baru ari profesor New South Wales madahka tu udah bisi 65,000 taun ke udah," ku iya nerang. -EDISI UKAS