KUCHING: Perintah Besai merambu deka ngaga Sarawak nyadi hab ngagai industri 'aerospace' menua tu.

Menteri Pemeranak Puku, Dagang enggau Industri, Senator Datuk Seri Zafrul Tengku Abdul Aziz madah, Sarawak ngembuan pengelebih ngemansangka industri nya lebih agi bepun ari pemeras ngadaka orang gawa bepengelandik ba pengawa nya.

"Sarawak sebedau tu kala madahka diri ngadaka mayuh pengelandik di universiti di Sarawak ti ngemeratka industri 'aerospace'.

"Nya alai ba runding kitai, pengelandik nya deka bisi kelimpah kitai ngira Sarawak tu semak enggau Nusantara (Indu Menua Indonesia), Korea, Jepun enggau Australia," ku iya madah.

Iya madahka pekara nya ba aum media udah betuaika aum Komiti Begulai enggau Pengatur Industri (JBI) Sarawak ditu, Hari Satu.

Nambahka jaku iya, Senator Datuk Seri Zafrul madah, perambu deka ngaga padang bilun antarabansa ke baru di Kuching enggau ngaga kompeni penerebai bilun enggi Sarawak bela dipeda ulih nyaup penumbuh industri 'aerospace' di nengeri tu.

"Kitai mega meda industri 'aerospace' deka muka awak ngagai industri ngatur enggau ngadu (MRO) kelimpah sektor kilang laban 'aerospace' tu begunaka kompeni ti bisi kaul enggau sektor kilang," pia ku iya.

Aum maya nya bela digulu Sapit Premier Sarawak ke mega Menteri Dagang Antarabansa, Industri enggau Pemeranak Puku, Datuk Amar Awang Tengah Ali Hasan, Menteri Pelajar, Inovasyen enggau Pemansang Pengelandik Dato Sri Roland Sagah Wee Inn, Sapit Menteri Dagang Antarabansa, Industri enggau Pemeranak Puku Sarawak Datuk Dr Malcolm Mussen Lamoh, Sapit Menteri Kuasa enggau Pemeruan Rampa Menua, Datuk Dr. Hazland Abg Hipni sereta bala pemesai ke bukai.-EDISI UKAS