KUCHING: Rayat di nengeri tu dibai bela beratika reti Aidilfitri ketegal ngira pengelantang semua napi pejalai pengidup.
Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol mai raban Islam di nengeri tu ngerichah Aidilfitri lebih agi begulai enggau sida ti enda tentu benasit manah.
"Pengerichah Hari Raya Aidilfitri taun tu pulai rami baka selama lebih agi sida ke ulih mulai kediri ke menua nyambut hari besai begulai enggau diri sebilik, bala kaban belayan enggau diri semenua.
"Aku mai bala mayuh bela berati silik agi reti Aidilfitri lebih agi ngagai sida ti kurang benasit tauka sida ke benung betapi enggau penyarut menua," ku iya madah beserimbai Hari Raya Aidilfitri 2024, Hari Dua.
Kelimpah ari nya Datuk Abdullah mai bala mayuh sama besampika pengelantang pengidup.
"Ngarapka pengelantang mengkang diasaika kitai semua lalu pengelikun nyumbuk ba selampur dunya.
"Aku besampika semua bengkah pejalai, diberi pengerai, pengering tubuh enggau runding bejalaika pengidup ti meruan," ku iya madah baru. -EDISI UKAS
