KUCHING: Rayat di nengeri tu patut mengkang beserakup nyerumba pengeransing deka bejadika tuju penumbuh Pelin Pemansang Udah COVID-19 (PCDS) 2030.
Sapit Premier Sarawak, Datuk Amar Prof Dr Sim Kui Hian madah, juluk ati ba PCDS 2030 ke semina tinggal enam taun agi patut dikemeratka lebih agi bekaul asil dalam menua kasar (KDNK) manggai RM282 bilion ba taun 2030.
"Kitai semina agi bisi enam taun agi dikena bejadika juluk ati bulih RM282 bilion KDNK alai kitai meseti bulih RM171 bilion sebedau taun 2030.
"Ari pemujur tu ukai semina Sarawak aja bepenatai pemisi besai tang mega tiap pintu bilik deka bulih penatai belanja ke besai maya nya ila.
"Tu ulih dipenyadi kitai nyema kitai mengkang beserakup," ku iya madah.
Iya bejaku munyi nya beserimbai Hari Raya Aidilfitri, Hari Satu.
Iya ke mega Menteri Pengerai Mensia Mayuh, Pengawa Berumah enggau Perintah Menua Sarawak madah, Sarawak diau ba renggat 'nempa menua' alai perintah nengeri berengkah meransang penumbuh ekonomi ngelawa tuju pemansang ke besai agi.
Ku iya, pekara nya ulih dipeda ari pemeras perintah Sarawak meri pelajar tinggi nadai bebayar ba semua universiti enggi Perintah Sarawak ba taun 2026 ila nyengkaum autonomi pengerai enggau pekara pelajar.-EDISI UKAS
