RECODA Mandang Palan Industri Samalaju Ba SPARK 2024
Disiarkan pada 26 Jul 2024
Sumber Berita: UKAS
KUALA LUMPUR:Opis Pemansang Koridor Kandang Menua (RECODA) mandangka palan Industri Samalaju (SIP) maya Ekspo Palan Industri pemeranak puku Selangor (SPARK) 2024.
Tuai Pegawai Eksekutif Recoda, Datu Ismawi Ismuni madahka tanggungpengawa SIP Sarawak matak pemeranak puku global nengah pengawa numbuhka kaul ari ngaga infrastruktur enggau ekosistem industri ti kondusif.
"RECODA sebedau tu kala enggau Sidang Kemuncak Dagang Antarabansa Selangor (SIBS).
"Taun tu, RECODA deka matak pemeranak puku lalu milih SIP nyadi palan meranakka puku ke dikedeka sida," iya madahka pekara nya nengah siti penerang media ari RECODA, kena Hari Empat tu tadi.
Datu Ismawi nambah, penyereta RECODA ba SPARK 2024 ngerintaika komitmen deka mandangka potensial ke besai ba Taman Perindustrian Samalaju.
"Hab industri tu beguna amat ngagai landskap ekonomi Sarawak ti meri peluang ke besai ngagai pemeranak puku enggau kilang.
"Kitai ditu deka nempa kerejasama baru sereta mandangka pengelebih strategik ke bisi dikembuan Palan Perindustrian Samalaju ngagai komuniti meranakka puku global," ku iya.
Nambahka jaku iya, Datu Ismawi madah, kelimpah Palan Industri Samalaju, RECODA mega bisi mantaika projek besai baka jalai besai Nebing Tasik Utara(NCH), Penyangkai Kapal Lebuh Tasik Lawas ke Baru, Padang Bilun Baru Lawas, Pelin Besai Steysen Betanam Betupi Bukit (IHAS) enggau Projek Ngaga enggau Nungkus (CPPC) di Spaoh, Betong enggau Sungai Baji, Sarikei.
Bekaul Palan Industri Samalaju di Bintulu, palan nya nyadi hab besai di Sarawak digaga dikena industri berat enggau insentif kuasa.
Kenyau ke udah ditumbuh ba taun 2008, Palan Industri Samalaju mujur matak pemeranak puku manggai RM56.67 bilion ke diatu bisi 14 kompeni ba dia nyengkaum Wenan Steel (M) Sdn Bhd, Ocikumho Sdn Bhd enggau Longi Malaysia.-EDISI UKAS
