KUCHING: Penyerakup, pengelantang enggau penaluk rayat nyadi pemun pemujur pengawa mai Sarawak nyadi menua progresif sereta mansang.
Sapit Premier Sarawak Datuk Amar Douglas Uggah Embas madah, pekara nya deka nyaup pemeras Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyura pemansang menua Sarawak.
"Iya udah ngaga mayuh pengawa ti dikeandal kitai ulih mai Sarawak datai ba tikas ke tinggi agi dudi hari ila.
"Siti ari pengawa ke digaga iya nya Pelin Pemansang Udah COVID-19 (PCDS) 2030 ke dilanggur nyadi program besai dikena iya ngubah Sarawak nyadi menua bepenatai pemisi besai manggai taun 2030," ku iya madah nengah penerang media beserimbai Hari Raya Aidilfitri 2024, Hari Satu.
Nambahka jaku iya, Datuk Amar Douglas Uggah mega madah, Hari Raya Aidilfitri disambut ngilah bida jalai pengarap enggau bansa, nyungkak pengerakup enggau pengelantang pengidup tiap iku rayat di Sarawak.
"Tu maya kitai semua enda ngira bansa enggau jalai pengarap, begulai enggau pangan diri ngerami reti penyerakup enggau penaluk.
"Baka hari besai bukai, Taun Baru China, Gawai Dayak tauka Krismas, aram kitai mengkang rindu ngabang ngagai pangan diri maya Hari Raya tu.
"Kitai andal ulah baka tu tau bendar negapka penyerakup, pengelantang pengidup sereta rinduka pangan diri seraya kitai besaup ngemansangka Sarawak," ku iya madah baru. -EDISI UKAS
