KAPIT: Unit Seberkas Kampung Muhibbah begulai enggau SABERKAS Pampang Bukit Goram udah mujur ngatur Program Jerayawara Bubur Lambuk enggau Pengerami Buka Puasa di Dewan Kampung Muhibbah, Hari Enam empai lama.
Berebak enggau nya, pengawa meri bantu baka bakul barang pemakai mega diberi ngagai sida ti kurang penatai pemisi.
Bejaku maya program nya, ADUN Bukit Goram, Datuk Jefferson Jamit Unyat madah, iya ke nyadi rayat dia semampai nyukung program baka nya dikena ngerichah agi Hari Raya taun tu.
“Program baka tu ulih meri chunto manah ngagai nembiak rebak baru lalu mega ulih negapka agi kaul kitai semua ba taun ti deka datai ila,” ku iya.
Ba program nya Datuk Jefferson mega bisi nyuaka pemeri duit raya ba tuju nyaup ngelempungka belanja bebelika barang dikena nyambut hari besai nya enda lama agi.
Sama bela datai, pengari ari Indu Opis Polis Pelilih Kapit ASP Anthony Apoi, Chairman SEBERKAS Pampang Bukit Goram Judson Jarrau, Temenggong Wasli, Pemancha Hamzah, Pemancha Pasang enggau temuai ke bukai. -EDISI UKAS
