KUCHING: Bisi 4,000 iti kupon promosyen dikena meli dagin enggau manuk udah disediaka ngagai mensia mayuh bebelika lauk nyerumba Hari Raya Aidilfitri.
Tuai Sekretari Politik ngagai Premier Sarawak Fazzrudin Abdul Rahman madah, Program Bejadika Semarak Syawal Agro Madani @ Medan Niaga Satok (MNS) ke diatur dua hari berengkah 8 ngagai 9 April nya dikena nyaup mensia mayuh ngemuntangka pengawa bebelika barang dikena nyambut hari besai nya.
“Ba program tu kitai meri ‘baucer’ ngagai mensia mayuh di Kuching.
“Ngarapka program tu ulih nyaup ngurangka belanja sida bebeli barang,” ku iya maya dirandau raban media sepengudah tembu bejadika program nya ditu, Hari Satu.
Iya madah, kedai ke ngambi bagi ba pengawa nya mega meri awak ngagai mensia mayuh bebelika barang Hari Raya ngena rega ke patut.
Bela datai maya nya, Menijar Besai SEDC, Datu Abdul Hadi Abdul Kadir, Chairman FAMA Nengeri Sarawak Ramli Mat Sani enggau pegawai ke bukai. -EDISI UKAS
