BINTULU: Bala Tuai Perintah Sarawak diperansang gawa bebendar nentuka nengeri tu terus mansang.
Menteri Industri Pemakai, Komoditi enggau Pemansang Wilayah Sarawak Dato Sri Dr Stephen Rundi Utom madah, Sarawak ngembuan pengelebih sereta bala tuai ke bepenau ngemudi nengeri tu nyapai pemujur.
Ku iya, Sarawak sebuah nengeri ke chukup kaya enggau pengeraja asal tang deka tinggal nyema semua asil penatai ke udah disedia enda dikena enggau manah.
“Ungkup raban Perintah Sarawak, kami gawa bebendar ukai semina ngangkatka ekonomi sosial aja tang mega pemansang bukai.
“Berindik ari nya, kitai mega deka numbuhka kompeni penerebai kediri, ngulihka saham ke besai dalam bank enggau ke bukai,” ku iya.
Iya madah munyi nya maya bejaku ba Pengerami Merarau Yang di-Pertua Negeri Sarawak Begulai Raban Tuai Komuniti Bagi Menua Bintulu, kena Hari Satu.
Pengerami nya udah dirichah enggau penatai Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Fauziah Mohd Sanusi sereta digulu urung 90 Tuai Raban Bansa enggau Tuai Komuniti (KMKK) ngelingi Bintulu.
Entara batang program nyengkaum pemerindang tanda selamat datai ari Tim Tanda BLF enggau pemerindang belagu ari Rhythm Raga Buskers.
Berebak enggau nya, Tun Pehin Sri Dr Wan Junaidi udah ngerandau bala KMKK enggau bala temuai ke bisi datai.
Ungkup rikod, tu penemuai rasmi keterubah Tun Pehin Sri Dr Wan Junaidi ngagai Bintulu kenyau ari dichiri nyadi Yang di-Pertua Negeri Sarawak ke-8 kena 26 Januari tu tadi.
Sama bela datai, Sapit Menteri Besai Dato Sri Fadillah Yusof, Menteri ba Opis Premier Sarawak Dato Sri John Sikie Tayai, Sapit Menteri Utiliti enggau Telekomunikesyen Datuk Dr Abdul Rahman Junaidi, ADUN Murum Kennedy Chukpai Ugon enggau bala tuai Opis bukai. -EDISI UKAS
