KANOWIT: Sepenyampau enam projek jalai alun benung digaga tauka deka berengkah enda lama da ba sitak Kaban Kaunsil Nengeri (ADUN) Ngemah.
Kaban Kunsil Nengeri (ADUN) Ngemah, Anyi Jana madah, bisi sekeda projek ke benung dipejalai ba sitak DUN Ngemah iya nya Jalai Nanga Kabah ngagai Nanga Beguang
“Ungkup Projek Jalai Nanga Ngungun ngagai Nanga Jagau, Renggat Keterubah ari Nanga Ngungun ngagai Nanga Bat deka ditinda enda lama da.
"Renggat Kedua enggau Ketiga mungkur ari Nanga Bat ngagai Nanga Pera enggau ari Nanga Pera ngagai Nanga Jagau deka berengkah pengudah renggat keterubah tembu," ku iya rambau Pengerami Tuai Begulai Enggau Rayat (MPBR) di Nanga Ngungun, kena Hari Enam.
Kelimpah ari nya, bisi dua projek jalai ke udah dikemendar iya nya Jalai Rumah Suzuzilily Baloh ngagai Nanga Ngemah enggau Jalai Nanga Dap ngagai Rumah Manggin, Nanga Buan mega diperambu deka dipejalai enda lama da.
Anyi mega ngemendar agih belanja Projek Mit Menua Pesisir (MRP) sepenyampau RM7,000 ungkup Komiti Pemansang enggau Pengelikun Genturung Pendiau (JKKK) Rumah Saini enggau RM3,000 ungkup Biro Indu dikena nyukung ngatur program kraf jari sida.
Sama bela datai iya nya bini Anyi Jana, Gelim Utan, Sekretari Politik ba Opis Menteri Penyerakup Bansa, Dr. Stephen William, Pegawai Atur Pengawa SMA, James Bunggan, Penghulu Dunstan Mandau, Penghulu Tiong Ming Kiong, Sapit Chairman PRS Ngemah Ramba Resang, Kaban Kaunsil Mutang Karani, Kaunsil Pelilih Kanowit enggau temuai ke bukai. -EDISI UKAS
