KUALA LUMPUR: Ex-Kaban Kunsil Nengeri (ADUN) Nangka, Datuk Awang Bemee Awang Ali Basah dipadu nyadi Yang Dipertua Dewan Negara Ke-21, sehari tu.
Pengawa nyiri nya dikena nyilih penuduk niang Datuk Mutang Tagal ke udah midang kena 10 Mei tu tadi.
Menteri Besai, Datuk Seri Anwar Ibrahim mantaika nama Awang Bemee ke mega nyadi chalun tunggal ke deka dipilih ba Aum Kedua Penggal Ketiga Parlimen Ke-15, sehari tu.
“ Iya ke mega peranak Sarawak, kala gawa ba Kort Tinggi Borneo Sarawak belabuh ari taun 1984 sereta ngembuan pengelandik mutar bemacham kes ba semua renggat kort, nyengkaum Kort Besai.
“Iya dipadu nyadi Chairman Kaunsil Penyangkai Kapal Kuching kenyau ari taun 1998 lalu kala mangku pengawa ba Kaban Kunsil Nengeri Sarawak pengelama tiga penggal.
“Endang amat iya ngembuan peneleba ke chukup mayuh lalu Nitihka Aum 2(1), aku udah nentuka iya setuju gawa, nyema dipilih,” ku iya.
Langgur nya disukung Menteri ba Opis Menteri Besai (Reformasyen Undang-Undang enggau Institusyen), Datuk Seri Azalina Othman Said.
Kena 15 Julai tu tadi, Awang Bemee udah angkat sumpah nyadi Senator ba mua Sapit Yang Dipertua Dewan Negara, Datuk Nur Jazlan Mohamed enggau pemendar Yang di-Pertuan Agong nyentuk 14 Julai 2027.
Iya kala nyadi ADUN Nangka pengelama tiga penggal berengkah ari 1996 nyentuk 2011.
Kelimpah ari nya, iya mega kala mangku pengawa nyadi Sekretari Agung Pemuda Parti Pesaka Bumiputera Bersatu (PBB) sereta kaban Kaunsil Supreme parti nya.
Penyanding Penemu Undang-Undang PBB enggau Pegawai Gabungan Parti Undang-Undang ke diatur mangku pengawa nyadi Chairman Kaunsil Penyangkai Kapal Kuching enggau Direktor Sarawak Plantation Berhad.
Iya mega siku pengemeran undang-undang ti bepeneleba mutarka kes sivil enggau penyalah ba semua kort nyentuk Kort Besai, kenyau ari diterima nyadi luyar bela enggau luyar chara Kort Tinggi Borneo ba taun 1984.
Diada kena 22 June 1959, di menua Sibu, Sarawak, Awang Bemee ngembuan Ijazah Sarjana Muda Undang-Undang ba Universiti Malaya.
Berindik ari nya, lebuh bejaku, Awang Bemme madahka iya deka bejalaika tanggungpengawa enggau lurus mandangka penaluk ngagai Malaysia sereta ngintu, nyaga enggau ngetan Perlembagaan.
"Tu siti basa besai ngagai aku baka dipadah bala bakih. Sehari tu ukai semina besejarah ba aku, tang mega basa ngagai anak Sarawak, peranak Malaysia ti deka dipilih nyadi Yang Dipertua Dewan Negara ke-21, tang mega ungkup Sarawak, siti menua ti numbuhka Malaysia, ngintu Hari Sarawak.
"Kena haribulan tu (22 Julai), Sarawak dilepas ari perekuh kolonialisme, berengkah merintah kediri lalu kena 16 September, Sarawak setuju begulai enggau Sabah sereta Persekutuan Tanah Melayu numbuhka Persekutuan Malaysia nengah Sempekat Malaysia 1963," ku iya.
Iya mega ngarika kaunsil meri Selamat Hari Sarawak ngagai semua rayat Sarawak, kelimpah besampika penyulut enggau pengelantang rayat enggau nengeri tu. -EDISI UKAS
