BINTULU: Sepenyampau 500 penyereta udah ngulu program ‘Fun Ride’ serimbai ngintu Hari Sarawak 2024 di Bintulu.
Sapit Menteri Nembiak, Lumba enggau Pemansang Orang Dagang Sarawak Datuk Dr Ripin Lamat madah, program tu chukup richah ke digulu peranak menua luar.
“Aku meda program beserimbai enggau ‘Fun Ride’ ba pengerami Hari Sarawak chukup richah, ke alai program tu udah digulu lebih 500 bala penyereta penyauh 15 kilometer.
“Ukai semina nya, bisi meha peranak menua luar nyereta program tu,” ku iya maya dirandau media pengudah sama ngulu program nya kena Hari Satu.
Pengawa ngelepas bala penyereta ‘Fun Ride’ udah dipenyadi Menteri Industri Pemakai, Komoditi enggau Pemansang Wilayah Sarawak ke mega Menteri ke beempu tanggungpengawa ungkup Pengerami Ngintu Hari Sarawak 2024, Dato Sri Dr Stephen Rundi Utom ba pelaman Dewan Suarah Bintulu.
Datuk Dr Ripin nambah, pengawa tu mega sebengkah program ti meransang gaya idup ti bepengerai ba rayat Sarawak.
Pekara ti narit ati, Datuk Dr Ripin mujur ngayuhka ensikal engga rikod timpuh sejam lalu nerima midul ari Direktor Opis Nembiak enggau Lumba Sarawak Lamat Nyalau.
Dulu ari nya, bisi mega diatur program senamrobik betuaika jurulatih Siti Nor Ziema ari Opis Menteri Raban Nembiak enggau Lumba Bintulu.
Sama bisi datai, Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew, Kaban Kunsil Nengeri(ADUN) Tanjong Batu Johnny Pang Leong Ming, ADUN Murum Kennedy Chukpai Ugon, Residen Bagi Menua Bintulu Nyurak Keti sereta bala tuai opis. -EDISI UKAS
