SERIAN: Opis Menteri Pelajar Malaysia kelebih agi Suruhanjaya Servis Pelajar (SPP) meseti lengkas mutar isu suntuk pengajar di Sarawak.
Menteri Pelajar, Inovasyen enggau Pemansang Pengelandik Sarawak, Dato Sri Roland Sagah Wee Inn madah, isu suntuk pengajar di nengeri tu ukai semina ngaul subjek Jaku English tang mega udah ngaul sekeda subjek bukai.
Meri perati pekara tu, iya madah bisi 1,000 iku pengajar ba sekula primari enggau 200 lebih pengajar sekula sekondari bulih palan ngajar tang penyampau nya agi enda tetangkupka guna di selampur Sarawak.
Iya madah munyi nya ba aum media pengudah bejadi pengawa Nasih Tanah Ngaga Palan Komuniti Gerempung Bansa Dayak Bidayuh (DBNA) ditu, kena Hari Enam tu tadi.
Kaban Kunsil Nengeri (ADUN) Tarat nya madah, pengawa ngambi pengajar meseti diatur bepelasarka prosedur enggau pengelandik ke patut lalu enda diambi sengapa ketegal ngisi pengawa puang.
Bekaul enggau nya, iya ngarapka raban SPP ke diatu benung bejalaika seksyen interbiu ulih ngamatka peminta kena mutar isu suntuk pengajar di Sarawak. -EDISI UKAS
