BINTULU: Raptai Penuh Malam Batang Pengerami Hari Sarawak 2024 ke diatur di Padang Bilun Lama Bintulu diatur lanchar enggau sekeda pengawa besikap kepenudi digaga nentuka pengerami nya diatur richah enggau chukup pengerami, kena 22 Julai tu.
Pengawa dipun enggau pemerindang ari Band Tuku Kamek, Kelab Asal Main Dayak (KEMADA) enggau digembar tanda ari Opis Main Asal Enggau Seni Menua (JKKN) Sarawak.
Menteri Industri Pemakai, Komoditi enggau Pemansang Wilayah Sarawak ke nyadi Menteri Megai Tanggungpengawa ngintu Hari Sarawak 2024, Dato Sri Dr Stephen Rundi Utom enggau Sekretari Perintah Sarawak, Datuk Amar Mohamad Abu Bakar Marzuki sama datai meda raptai penuh enggau besikap kepenudi dia.
Bala bukai ke sama Datai Sapit Menteri Nembiak, Lumba enggau Pemansang Orang Dagang Sarawak, Datuk Dr Ripin Lamat, Sapit Menteri Industri Pemakai, Komoditi enggau Pemansang Wilayah Sarawak, Datuk Martin Ben, Sapit Sekretari Perintah Sarawak (Operasyen), Datu Hii Chang Kee, Residen Bagi Menua Bintulu, Nyurak Keti sereta bala Tuai Opis Perintah Nengeri enggau Perintah Besai.
Ungkup rikod, malam batang pengerami kena 22 Julai ila deka richah enggau penatai Yang Di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini Toh Puan Fauziah Mohd Sanusi sereta Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau bini Puan Sri Datuk Amar Juma’Ani Tun Tuanku Bujang.
Kelimpah ari nya, malam nya mega deka bisi pemerindang khas baka teater muzikal ari Pantomin Muzikal Sarawak Maju Makmur enggau mai bala pengelulu baka Azam Pitt enggau Anding Indrawani.
Berebak enggau nya, pengawa mantaika penau anak Sarawak mega bisi dibantai baka Sulaiman Usop, Daus Eli, Chien Ng, Melissa Francis enggau Roxy Ixzy Sereta bala artis tebilang baka Dayang Norfaizah enggau Bob Yusof.
Batang Pengerami Hari Sarawak 2024 deka dirami ngena main bungai api.- EDISI UKAS
