MUKAH: Pengerami Kaul bisi penngulih nyadi penyungkak sektor dagang temuai enggau ekonomi ba menua Mukah.
Premier Sarawak Datuk Patinggi Tan Sri Dr Abang Johari Tun Openg madah, tu pengudah pengerami nya digazet dalam Kalinda Dagang Temuai Sarawak lalu matak bala temuai lokal enggau luar menua.
"Projek ngaga Padang Bilun di Mukah sebagi ari pengawa perintah meransang temuai ari luar menua datai ke Mukah.
“Pemisi perengka Infrastruktur tu ulih narit ati bala temuai mayuh agi datai ke Mukah, ukai semina maya pengerami Kaul Mukah aja, tang sebarang program tauka pengawa ke bisi diatur ba Mukah.
Iya madah munyi nya nengah teks jaku ke dibacha Menteri Pembansang Indu, Nembiak Mit enggau Pengelantang Komuniti Datu Seri Fatimah Abdullah ba Pengerami Bejadika Kaul Mukah 2024 enggau Regata Mukah 2024 ba Palan Pengerami Kaul, kena Hari Enam tu tadi.
Berebak enggau nya, raban peribit mega patut bejalaika tanggungpengawa sida ngemansangka industri dagang temuai enggau mayuh agi baka nambahka agi hotel enggau palan endur diau bemalam dikena nangkup peminta bala temuai nyengkaum program diau ba menua.
Nangkan nya, raban perintah semampai meri sukung ke tegut ngemujur pengawa tu dikena nentuka iya ulih dikelala peranak lokal enggau luar menua.
Sama bisi datai, Sapit Menteri Dagang Temuai, Industri Kreatif enggau Seni Pemerindang, Datuk Sebastian Ting Chiew Yew, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Kaban Parlimen Mukah Datuk Hanifah Hajar Taib, Kaban Kunsil Nengeri (ADUN) Balingian Abdul Yakub Arbi, ADUN Tellian Royston Valentine enggau ADUN Daro Shafiee Ahmad. –EDISI UKAS
