MUKAH: Pengerami Kaul Mukah 2024 diatur enggau richah sereta nerima timbal ke manah ari mensia mayuh taja bisi pengerami ba endur bukai.
Sapit Menteri Ekonomi ke mega Kaban Parlimen Mukah, Datuk Hanifah Hajar Taib madah, taja bisi ka lembau mimit ba pun, tang ulih diperati pengerami ke diatur ninting taun nya majak rami bala pengusung.
"Alhamdulillah ari sukut ngatur pengerami Kaul Mukah 2024, semua udah mujur dipejalai lalu kitai ulih meda bisi bansal ke baru dikena mandangka budaya sida empu.
“Ukai semina nya aja, mayuh agi koleksyen fesyen enggau perengka ke lama dipandang sepemanjai pengerami kaul tu diatur sereta bekunsi penemu enggau rebak baru bekaul enggau penatai asal, “ ku iya.
Berebak enggau nya, iya udah meri puji ngagai pengatur program Teluwaih Jinih ke alai bala penyereta udah mandangka ngepan asal.
Iya madah munyi nya maya dirandau pemberita sepengudah bejadika Bansal Komuniti serimbai pengerami Kaul Mukah 2024, di Palan Kaul kena Hari Lima tu tadi.
Hanifah mega bisi ngenang pasal Galeri Tun Abdul Taib Mahmud serimbai pengerami Kaul Mukah 2024 nyadi siti pengawa dikena ngingatka niang begulai enggau rayat kelebih agi komuniti di menua Mukah.
Nangkan ke nya, Hanifah bisi limpang ngabas 22 bansal komuniti serimbai pengerami Kaul Mukah 2024 lalu iya nguji pemakai komuniti Melanau ke udah dinah sereta meda palan pemandang ke bisi ba bansal nya.
Sama datai, Kaban Kunsil Nengeri (ADUN) Balingian Abdul Yakub Arbi enggaun ADUN Tellian Royston Valentine. -EDISI UKAS
