SINGAPORE: Opis Dagang enggau Dagang Temuai Sarawak di Singapore (STATOS) merambu ngatur pengerami Sarawak Mega Fest di menua nya ba taun baru.
Chairman STATOS, Tan Sri Mohamad Morshidi Abdul Ghani madah, tuju festival nya ngelakuka Sarawak ari semua sukut nyengkaum dagang temuai, pengawa dagang enggau mayuh ke bukai.
“Kitai mega udah ngelanggur deka ngatur pengerami Sarawak Mega Fest taun baru. Ngarapka pengawa tu ulih diatur enggau lanchar.
“Pengerami Mega Fest ke deka diatur enggau besai agi ari tu, kitai deka nyelinting pengawa dagang, temuai dagang, meranak puku, pemakai, budaya enggau mayuh agi,” ku iya.
Iya madah munyi nya maya dirandau pemberita ba program Borneo Fest 2024 ditu, kena Hari Enam tu tadi.
Berebak enggau nya, Tan Sri Mohamad Morshidi mega madah ke pemujur STATOS di Singapore nyadi penyungkak rembus makit global.
“Kitai udah lima taun ba Singapore, lalu kitai ngena Singapore tu nyadi jalai dikena kitai rembus ba makit luar. Enti sema kitai udah tama ba makit menua Singapore, reti iya kitai udah nyapai standard menua tu, lalu lebuh udah nyapai pemujur tu, kitai mega udah nyapai standard ikas dunya. Diatu, kami benung ngining makit ngilah menua Singapore,” ku iya.
Sama bisi datai, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, Menteri Dagang Temuai, Main Asal enggau Rampa Menua Sabah, Christina Liew Chin Jin, Pesuruhjaya Tinggi Malaysia ke Singapore, TYT Dato' Dr. Azfar Mohamad Mustafar, Tuai Pegawai Eksekutif (STATOS), Chew Chang Guan, Tuai Pegawai Eksekutif (STTOS), Wendy Clare sereta bala kaunsil STATOS & STTOS ke bukai.-EDISI UKAS
