SINGAPORE: Penyelai ekodagang temuai sereta utai tumbuh enggau utai idup ke bisi di menua Sarawak pematak besai temuai ari Singapore datai ke Tanah Kenyalang.
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, pematak nya nyengkaum budaya, pemakai enggau pengerami ke mega nyukung penegap Sarawak dalam sektor dagang temuai.
Ku iya, nengah Borneo Fest 2024 Singapore ke diatur Opis Dagang enggau Dagang Temuai Sarawak di Singapore (STATOS) tu sebengkah singkag ke cukup manah dikena negapka agi dagang temuai di Sarawak.
“Aku nemu mayuh bala temuai rindu deka nemuai ngagai menua Sarawak, bayam pemanah rampa menua, laban kitai ba Sarawak semampai ngemeratka CANFF iya nya, Culture (Budaya), Adventure (Bejalai Matau Menua), Nature (Rampa Menua Asal ), Food (Pemakai), enggau Festivals (Pengerami) (CANFF).
“Kitai ba Menua Sarawak ngembuan mayuh seni budaya ngelui 30 raban bansa sereta ngembuan mayuh palan ke narit ati, pemakai sereta ke bukai,” ku iya.
Iya madah munyi nya maya dirandau pemberita sepengudah bejadika program Borneo Fest 2024 ditu, kena Hari Enam tu tadi.
Berebak enggau nya, Datuk Snowdan madah ke diri mega andal ke Sarawak ulih nyapai juluk empat juta pengusung nemuai ke nengeri nya taun tu.
“Enti kitai berati ba taun ke udah, kitai semina ngadang lebih 3 juta pengusung tang kebendar, juluk kitai ngelui ke udah disadang. Nya alai ba taun tu kitai ngandalka urung empat juta lalu aku pechaya ari penyampau ke udah dikeandal kitai empat juta temuai ke Sarawak ba ujung taun 2024 tu,” ku iya.
Sama bela datai, Menteri Dagang Temuai, Main Asal enggau Rampa Menua Sabah Christina Liew Chin Jin, Pesuruhjaya Tinggi Malaysia ke Singapore, TYT Dato' Dr. Azfar Mohamad Mustafar, Chairman (STATOS), Tan Sri Mohamad Morshidi Abdul Ghani, Tuai Pegawai Eksekutif (STATOS), Chew Chang Guan, Tuai Pegawai Eksekutif (STTOS), Wendy Clare enggau bala Kaban Kaunsil STATOS.-EDISI UKAS
