SUKMA 2024: Sarawak Deka Nentuka Padang Bol Likun
Disiarkan pada 17 Jul 2024
Sumber Berita: UKAS
SIBU: Perintah Sarawak deka nentuka genap padang bol Lumba Malaysia (SUKMA) XXI Sarawak 2024 likun.
Sapit Menteri Nembiak, Lumba enggau Pemansang Orang dagang Sarawak Dato Gerald Jabu madah, tu kena nagang ari peragam penemu ke enda manah ari nengeri bukai ke bisi ngambi bagi ba pekit tu.
“Nyadi tuai kontinjen Sarawak, aku seruran ngabas padang bol tu laban tu mega sebengkah ari fasiliti opis menteri aku.
“Kitai enggai ninga sebarang penemu ke enda manah didinga ari nengeri bukai lalu madah kitai tu enda nyikap padang ke manah agi ari tu.
“Nyadi kitai udah minta bantu ari Gerempung Lumba Sarawak (SCC) sereta Serakup Main Bol Sarawak mantu matau bala kunteriktor ke bekaul,” ku iya.
Iya madah munyi nya ngagai media sepengudah ngabas padang bol di Stadium Tun Zaidi ditu, kena Hari Tiga.
Berebak enggau nya, Dato Gerald mega madah, pengatur pekit main bol tu deka diatur ba lima venue ke bebida lalu dipelaba nadai sebarang penanggul ke nyadi kelebih agi ngagai mensia mayuh ke rindu main bol.
Pekit main bol berengkah 12 Ogos 2024 , lalu diatur ba Stadium Bintulu (Bintulu), Stadium Tun Zaidi enggau Palan Lumba Komuniti Azman Hashim (Sibu), Stadium Mukah enggau Padang MDDM (Mukah).
Ku iya, pekara nya enda mai sebarang penanggul ba renggat kepenudi, ke diatur di Mukah kena 24 Ogos ila.
“Enti sida ke rindu enggau main bol sigi nadai penanggul.
“Nyadi, kitai udah ngadang tu nadai mai sebarang penanggul,” ku iya.
Pengawa pejalai gawa Dato Gerald lalu ditangkan ngagai Dewan Main Bola Tampar di Rejang Park, Sibu Indoor Stadium enggau Palan Lumba Komuniti Azman Hashim.-EDISI UKAS
