RM1 Bilion Diguna Nempa Sarawak Nyadi Tibang Padi
Disiarkan pada 17 Jul 2024
Sumber Berita: UKAS
MIRI: Sepenyampau RM1 bilion diguna kena ngemansang tanah pemesai 5,000 hektar di selampur Sarawak ngambi nyadi siti ari Tibang Padi di Malaysia.
Menteri Industri Pemakai, Komoditi, enggau Pemansang Wilayah Dato Sri Dr Stephen Rundi Utom madah, tu kena nyendiaka infrastruktur ke ulih nangkup pengawa nanam padi sereta bansa varieti ngeluar asil padi ke tinggi kelebih agi padi bansa U-Putra asil pansik Universiti Putra Malaysia (UPM).
“Kitai udah berandau enggau Menteri Betanam Betupi enggau Jamin Pemakai Datuk Seri Mohamad Sabu ke alai kitai udah ngelanggur pekara tu ngena ungkus RM1 bilion.
“Perintah Sarawak udah setuju deka nangkup belanja setengah ari ungkus nya, iya nya RM 500 juta lalu diatu kitai nganti agih belanja ari Perintah Besai.
“Taja timbal manah ari Perintah Besai, tang agih belanja nya disadang deka diterima taun nyin ila,” ku iya.
Iya madah munyi nya rambau aum media sepengudah Seminar Nasional Ke-16 (NATSEM 2024) - Peluang & Strategi: Nambah Penguntung Dagang Sawit di sebuah hotel tebilang di Miri, kena Hari Satu tu tadi.
Dato Sri Stephen Rundi madah baru, perambu tu ila ulih mantu nambahka Tikas Belanja Idup (SSL) ke bisi di Malaysia ke alai SSL di Malaysia semina 32 paratus.
Ku ya, Perintah Malaysia beguna 68 peratus berau import ungkup domestik.
Kelimpah nya, iya mega ngarapka perintah ulih ngaul diri ba pekara tanah umai padi ditukar ngagai utai tanam ke bukai.
"Pekara tu nyau majak kurang, ke alai tanah umai padi ditukar ngagai utai tanam bukai, ari 77,000 hektar umai padi diatu nurun ngagai 60,000 hektar, nya alai perintah enda tau enda ngaul diri dikena napi pengawa betukarka umai padi.
Iya nambah baru, ari pengawa ngaga infrastruktur ari bemacham renggat ila, tanah endur bumai padi diungkupka nanam padi aja.
Iya nerang agi, Perintah sarawak mega nadai bulih sebarang penguntung ari projek Tibang Padi tu tang deka nentuka jamin pemakai.
Berebak enggau nya ku iya, agih belanja ke dipinta beguna endar tang belanja ke dipinta nya besai agi laban agih belanja ke dipinta semina umbas ungkup 3,000 hektar aja lalu menua Sarawak bisi juluk deka ngemansang projek tu ngagai 10,000 hektar. -EDISI UKAS
