Rambai Jaku Hari Sarawak 2024 ‘Sarawak Maju Makmur Dalam Malaysia’
Disiarkan pada 17 Jul 2024
Sumber Berita: UKAS
MIRI: 'Sarawak Maju Makmur Dalam Malaysia' dipilih nyadi rambai jaku pengerami Hari Sarawak 2024 ke deka diatur di Bintulu, kena 22 Julai tu.
Menteri Industri Pemakai, Komoditi enggau Pemansang Wilayah Sarawak Dato Sri Stephen Rundi Utom madah, rambai jaku taun tu dikena madangka menua Malaysia ngulih pemaik enti sema Sarawak terus mansang sereta lantang.
Ku iya, nyengkaum menua Sabah enggau Semenanjung Malaysia mansang sereta lantang, nya alai Malaysia patut mansang mega.
“Kitai enggai masau jam besalahka orang bukai ti semina ngiga penyalah pangan diri.
“Tang kitai patut ngiga chara baka ni negapka agi belanja kitai empu lalu enda ibuh kelalu bepanggai ba Perintah Besai,” ku iya.
Iya madah munyi nya maya bejaku ba Seminar Nasional Ke-16 (NATSEM 2024) - Peluang & Strategi: Ngangkat Penguntung Dagang Sawit ba sebuah hotel tebilang di Miri, kena Hari Satu tu tadi.
Nangkan nya, menua Sarawak bisi tuju ngangkat nengeri tu ulih nyingkang ke mua ngena chuan diri empu dalam Malaysia.
Ku iya, Perintah Sarawak semampai bekunsi chara, kerejasama sereta besaup gawa enggau bala bukai di Malaysia ngambi menua tu seruran mansang sereta lantang.
Ba awak nya, Dato Sri Stephen Rundi ke ngari ke Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah bejadika seminar nya.
Ku iya, seminar nya udah mujur narit 860 raban enggau pemekuh industri sawit nya ari selampur menua ke deka diatur pengelama tiga hari berengkah 15 ngagai 17 Julai tu.
Sama datai, Sekretari Opis Menteri Pekebun Enggau Komoditi Dato’ Yusran Shah Mohd Yusof Tuai ngari ke Menteri Pekebun enggau Komoditi Malaysia Datuk Seri Johari Abdul Ghani, Chairman ‘The Incorporated Society of Planters’ Datuk Daud Amatzin, Chairman ISP Management (M) Sdn Bhd Mohamad Fadzil Hitam sereta temuai dipebasa ke bukai . -EDISI UKAS
