BINTULU: Sektor betanam betupi udah nyaup meri RM14 bilion ngagai Asil Dalam Menua Kasar (KDNK) nengeri tu.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, sektor betanam betupi entara sektor pemadu mayuh nyaup KDNK Sarawak ditangkan sektor servis, kilang, ngali enggau kuari.
"Ba taun 2022, sektor betanam betupi udah nyaup 10.4 peratus tauka RM14 bilion ngagai KDNK Sarawak.
"Tu datai ari sektor tu ngagai pemansang ekonomi nengeri Sarawak," ku iya maya Pengerami Bejadika Sarawak Agrofest 2024 ditu, Hari Lima .
Nambahka jaku, Datuk Patinggi Abang Zohari madah, Sarawak udah ngatur reformasyen dalam ba proses pemansang sektor pemakai, tanah enggau orang gawa.
Bela diatur maya nya, pengerami nyuaka anugerah enggau basa ngagai orang bumai, bekebun enggau orang berikan, kelimpah pengawa Besilih Dokumen Sempekat Kerejasama entara Perintah Sarawak enggau sekeda agensi nyengkaum USAINS Infotech Sdn. Bhd. (USM), UNIMAS Holdings Sdn. Bhd. (UNIMAS), Seri Serapi Trading Sdn. Bhd. enggau Peladang Agrotech Sdn. Bhd. (Bellus Terra).
Berebak enggau nya, Datuk Patinggi Abang Zohari mega bela meda Palan Pemandang Sarawak Agrofest 2024s sereta ngenataika pemeri ba Pengerami Ngelai Nyuaka Bantu Baja Ngagai Pekebun Mit Sawit enggau Lada (BBSKL) 2024.
Bela datai bini, Premier Sarawak Puan Sri Datuk Amar Juma’ani Tun Tuanku Bujang, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Industri Pemakai, Komoditi enggau Pemansang Kandang Menua, Datuk Dr Abdul Rahman Ismail enggau Datuk Maclaine @ Martin Ben, Sekretari Mendam Opis Menteri Industri Pemakai, Komoditi enggau Pemansang Kandang Menua Sarawak Sirai Daha, Residen Sitak Bintulu Nyura Keti enggau temuai dipebasa ke bukai. -EDISI UKAS
