Dato Sri Julaihi Betuaika Program Nemuai Gawa ngagai VERBUND, Austria
Disiarkan pada 12 Jul 2024
Sumber Berita: UKAS
VIENNA: Menteri Utiliti enggau Telekomunikesyen Sarawak, Dato Sri Julaihi Narawi betuaika opis menteri iya begulai enggau Sarawak Energy Berhad (SEB) ngatur program nemuai gawa meda operasyen karan enggau kuasa gadung di Eropah, VERBUND Energy4Business GmbH ke ngasilka kuasa ari palan kuasa di Sungai Danube, Austria, empai lama tu tadi.
Maya nya, Dato Sri Julaihi madah, VERBUND ngembuan kapasiti 6,600 Megawatt (MW) ti ulih ngasilka karan 24.8 kilowatt jam (kWj) setaun.
“Dipelaba 90 peratus kuasa ari VERBUND iya nya ari kuasa hidro lalu 51 peratus saham VERBUND enggi perintah Austria,” ku iya.
Ba hari keterubah, raban Opis Menteri Utiliti enggau Telekomunikesyen Sarawak (MUT) begulai enggau SEB diberi penerang khas ari Dr Klaus enggau tiga iku bakih gawa ti madahka loji kuasa di Vienna udah digaga kenyau ari taun 1947.
Ku iya, kelimpah di Vienna, VERBUND mega ngasilka kuasa lalu benung ngaga palan kuasa simpan ti dipam di Kaprun ba endur ti begunung, 1.5 jam penjalai ari Salzburg, Austria.
Ba hari kedua, raban MUT enggau SEB bisi nemuai ngagai logi ba Kaprun di Salzburg, tiga jam setengah pejalai ari Vienna.
“Ba Kaprum, kami datai meda Loji 3 ke disadang ulih ngasilka 480 MW ke benung digaga 75 peratus tembu ba baruh tanah enggau penalam 450 meter nengah jalai khas sepenyauh 5.5 kilometer (km).
“Kami mega diberi penerang khas ari Pegawai Teknikal Kanan Fabian Kumer lalu udah nya dibai nemuai ngagai Loji 2 ke udah tembu ke udah beroperasyen kenyau ari taun 2011 ti udah ngasilka kuasa 480 MW.
“Sepengudah ba Logi 2, kami lalu dibai ngabas tekat ai ba ulu Sungai Danube asal penatai ai simpan ba pam Kaprun enggau loji ke bukai di Vienna,” ku iya.
Dulu ari nya, Dato Sri Julaihi bisi nemuai ngagai Komiti Antarabansa Nyaga Sungai Danube (ICPDR).
Iya begulai enggau raban MUT enggau SEB udah nemuai sereta mending penerang khas ari raban ICPDR ke udah ditumbuh kenyau ari taun 1998 ti ngatur sereta Sungai Danube dikena 19 buah menua.
Bela datai maya nya, Tuai Pegawai Eksekutif Kumpulan SEB, Datuk Sharbini Suhaili. -EDISI UKAS
