KUCHING: Shell Middle Distillate Synthesis (MDS) Malaysia udah ngepun pengawa ngaga mentiga ke
disintesis ari gas ti keterubah iya digagaka dagang di dunya.

Premier Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg madah, pemujur nya nyadi singkang besai ke mua ba teknologi pemakai enggau pemansang industri di Sarawak.

Ku iya, produk nya bisi pengulih dikemansangka agi ba macham sektor ekonomi nyengkaum pemakai.

"Mayuh produk baru ke bukai, teknologi baru ti bepelasarka gas nyadi kereban pemakai.

“Enti udah diaku ba renggat antarabansa, mentiga ari gas tu ulih nyungkak industri pemakai," ku iya.

Iya bejaku munyi nya maya Pengerami Makai Lemai Beserimbai Nyambut Penumbuh Ke-30 Taun Shell MDS (Malaysia) Sdn Bhd ditu, Hari Tiga.

Maya nya mega Datuk Patinggi Abang Zohari madahka pemesai reti gas nyadi kereban mata dikena ba sektor petrokimia ti numbuhka pengawa puang sereta nyungkak ekonomi.

Kelimpah ari nya, iya bela madahka penumbuh kompeni Petroleum Sarawak Berhad (Petros) ti nyamin menua tu bela disengkaum ba pengawa industri nya.

"Perintah Sarawak semampai nyadi bakih kunsi kita diatu enggau ila. Kitai endang bisi pemain baru nyengkaum kompeni minyak menua nyadi bakih kunsi.

"Baka ke ditemu kitai mayuh, diatu kitai udah tetemuka palan gas baru. Nyangka taun-taun ke deka datai, kitai tetemuka endur bukai," ku iya madah baru.

Bela datai maya nya Sapit Premier Sarawak, Datuk Amar Prof. Dr. Sim Kui Hian, Speaker Kunsil Nengeri Sarawak, Tan Sri Datuk Amar Mohamad Asfia Awang Nasar, Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua Sarawak, Datuk Dr. Hazland Abang Hipni, Chairperson Menua Shell Malaysia enggau Mandal Presiden Kanan Huluan Malaysia, Siti Hurrairah Sulaiman, Direktor Pengatur Shell MDS Malaysia, Amir Bakar sereta bala bukai. -EDISI UKAS