SUKMA XXI: Atlit Sarawak Patut Ngembuan Runding Deka Menang
Disiarkan pada 10 Jul 2024
Sumber Berita: UKAS
KUCHING: Atlit Sarawak ke besemekih ba Lumba enggau Main Malaysia (SUKMA)ke-21 Sarawak 2024 Ogos ila ditangkan ngambika ngembuan runding deka menang maya besatup enggau atlit ari nengeri bukai.
Menteri Nembiak, Lumba enggau Pemansang Orang Dagang Dato Sri Abdul Karim Rahman Hamzah madah, SUKMA baka gelanggang perang ti begunaka Strategi ke engkeman sereta ngembuan pengeransing runding.
"Bepekit dalam SUKMA baka ke nurun beperang. Enti kitai deka nurun beperang, kitai merambu strategi enggau manah.
"Kita mesti ngembuan runding ke betul, penemu ke betul sereta motivasyen ke betul, kelebih agi atlit biak kitai.
Iya madah munyi nya ba program aum penerang begulai enggau Chef de Mission (CDM) enggau Assistant Chef de Mission (ACDM) kontinjen Sarawak ke diatur ba Palan Konvensyen Borneo Kuching (BCCK), kena Hari Dua tu tadi.
Kelimpah ari nya , iya mega madah Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg semampai beratika pemujur atlit ninting hari maya SUKMA nya ila
"Udah tentu sekeda atlit kitai meda atlit ari nengeri bukai manah agi ari sida.
"Tu mih batang pengawa ACDM, pengatur tim enggau 'jurulatih' meri peransang ngagai bala atlit ngambika sida enda ngasaika diri baruh ari atlit nengeri bukai," ku iya madah baru.
Sama datai Sapit Menteri Nembiak, Lumba enggau Main sereta Pemansang Orang Dagang ke Tuai Kontinjen Sarawak, Dato Gerald Rentap Jabu, Sapit Menteri Nembiak, Lumba enggau Main sereta Pemansang Orang Dagang Datuk Ripin Lamat, Sapit Sekretari Perintah Sarawak (Operasyen) ke mega Tuai Pegawai Eksekutif (CEO) SUKMA XXI 2024 Datu Hii Chang Kee, Sekretari Mendam ba Opis Menteri Nembiak, Lumba enggau Sukan sereta Pemansang Orang Dagang Morshidi Fredrick, CEO Kunsil Lumba enggau Main Sarawak (SCC) Awang Putrayusrie Awang Redzuan sereta raban ACDM, Pengatur tim 'jurulatih' 37 bengkah lumba enggau main ke dipekit. -EDISI UKAS
