Sibu Life Care Society Nerima Pemeri Katil Hospital
Disiarkan pada 09 Jul 2024
Sumber Berita: UKAS
SIBU: Sibu Life Care Society udah nerima pemeri katil hospital ari Sapit Menteri Pengerai Mensia Mayuh, Pengawa Berumah enggau Perintah Kandang Menua Datuk Michael Tiang Ming Tee.
Pemeri nya kelai sukung penuh iya ngagai komitmen gerempung nya nyendiaka perengka berubat ngagai sida ti begunaka bantu.
Datuk Michael Tiang madah, pengawa ke dikereja gerempung nya endang dibasa.
"Nyadi pengari rayat, kelai sukung, aku meri katil hospital lalu besaup enggau Sibu Life Care Society ba pekara bukai lebih agi bekaul perengka berubat," ku iya.
Iya madah munyi nya lebuh dirandau media pengudah nyuaka pemeri nya ba Sibu Life Care Society ditu, kena Hari Satu tu tadi.
Nangkan nya, Datuk Michael Tiang madah baru, pesakit ti enda ulih meli katil hospital ketegal ungkus ti mar tau nginjau ari gerempung nya enggau deposit RM500 lalu deka dipulaika baru.
Ku iya, kelimpah ari katil sepital, sida mega bisi nyendiaka bemacham kereban perubat bukai baka kerusi roda, tilam khas, perengka dikena ngintu diri, sekeda perengka sekali guna enggau gari ungkup sida ti begunaka bantu.
Maya nya mega, Datuk Michael Tiang bisi ngungkupka geran ninting taun RM20,000 ngagai gerempung nya berengkah ari taun baru. - EDISI UKAS
