Nulis Berita enggau Silik, Kenatai Penerang Ti Penuh & Betul
Disiarkan pada 08 Jul 2024
Sumber Berita: UKAS
KUCHING: Pemekuh media tauka pemberita kemaya hari tu beguna endar nulis berita enggau silik dikena ngenataika penerang ti penuh sereta betul ngagai mensia mayuh.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, pekara tu beguna amat berindik ari berita ti ditulis pemberita agi bisi pengelemi kelebih agi ari sukut analisis.
"Kekadang pemberita patut ngaga analisis sereta ngaga mayuh agi tungkap ngaga berita lalu enda bepanggai penuh ngagai teks jaku temuai dipebasa,” ku iya.
Iya madah munyi nya maya bejaku ba Pengerami Ngiling Tikai Unit Komunikasyen Perintah Sarawak (UKAS) Sarawak, kena Hari Minggu tu tadi.
Datuk Abdullah mega madah, pengawa nulis berita silik agi ulih ningkah jaku sida ti nguji ngerembaika penemu ngelabuhka Sarawak.
Ba pengerami ke digulu bala staf UKAS nya, sida bela ngemata Pengerami Ngiling Tikai ti dipenyadi Datuk Abdullah.
Berebak enggau nya, pengawa chabut tikit benasit sereta pemerindang belagu enggau betanda dikena ngerichahka agi pengerami nya.
Sama datai Direktor UKAS Samuel Simon, Presiden Gerempung Pemberita Bagi Menua Kuching (KDJA) Ronnie Teo enggau bala temuai dipebasa bukai.-EDISI UKAS
