Ripot Jampat Kes Ngereja Kayu Belalai
Disiarkan pada 06 Jul 2024
Sumber Berita: UKAS
BUKIT BEGUNAN: Sebarang kes berimba kampung nadai pemendar ke bisi nyadi enda tau enda dipadah jampat ngagai raban bekuasa ngambi atur terit ulih dipejalai tekala nya.
Kaban Kunsil Nengeri (DUN) Bukit Begunan, Datuk Mong Dagang madah, Sarawak diatu nadai agi meri lisin aktiviti ngereja kayu.
Mensia mayuh kelebih agi bala tuai kandang menua patut ngeripot enti sema bisi pengawa nya nyadi ba menua sida empu.
Meri perati ba pekara ti nyadi di Bukit Nimong, iya ngelalau bala Tuai Rumah ba menua nya ngeripot pekara nya enggau jampat sebedau pekara bukai nyadi.
Iya madah munyi nya maya bejaku ba Program Tuai Begulai enggau Rayat di Rumah Kedeni, kena Hari Lima tu tadi.
Nerang enggau silik agi, iya ngelalau mensia mayuh anang beambi ulih ngambi lumpung kayu, kelebih agi di menua pesisir.
Berebak enggau nya, Datuk Mong ba program nya bisi ngemendarka agih belanja projek Program Transformasyen Menua Pesisir (RTP) sepenyampau RM100,000 ungkup kereja nyemin ba pelaman rumah panjai ti dikerandauka seraya RM15,000 ngena agih belanja Projek Mit Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) Rumah Kedeni.
Ba pengawa ke sama, iya bisi nyuaka agih belanja MRP ngagai dua buah JKKK enggau Gerempung Veteran Raban Soldadu Sri Kandi Pampang Sri Aman sepenyampau RM27,000.
Sama datai, Penghulu Riji Gu. -EDISI UKAS
