MIRI: Bisi 16,624 iku ari 31 peratus penerima deka nerima pemeri bantu beserimbai enggau Hari Raya Aidilfitri ke diungkupka RM1,662,400.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, ba taun 2024, bisi 976 iku ngintu pengerami Hari Raya Aidilfitri iya nya 4,283 orang udah nerima bantu nya ninting bulan di Miri.
“Ari Januari nyentukka Mac 2024, Opis Pengintu Pengelantang Mensia Mayuh (JKMS) udah ngungkupka belanja sepenyampau RM64,495,350 ngagai 54,321 orang nerima bantu ninting bulan nya ba selampur nengeri Sarawak.
“Berebak enggau nya, ari Januari nyentuk Mac 2024, Opis Pengelantang Komuniti Sitak Miri udah nyua agih belanja sepenyampau RM5,454,800 ngagai 4,283 orang nerima bantu ninting bulan di Miri,” ku iya.
Iya nerangka pekara nya maya bejaku ba Pengerami Sejambak Kasih Hari Raya Aidilfitri 2024 Sitak Miri di Hotel Dynasty, Miri ditu, Hari Empat.
Ba pengawa nya mega, bisi 150 iku datai nerima duit bantu sepenyampau RM100.
Nangkan nya, Dato Sri Fatimah mega madah, Pengerami Majlis Sejambak Kasih Hari Raya Aidilfitri 2024 ke diatur ba Dewan Masyarakat Bekenu maya 3 April tu tadi bisi 100 iku penerima mega nerima duit bantu sepenyampau RM100.
“726 iku penerima ke bukai mega sama bela bulih RM100 ti deka dikredit ngagai akaun sida ila,” ku iya.
Sepengudah tembu pengawa nya, Dato Sri Fatimah lalu ngelawa ngagai Klinik Jaya Medik ba Centre Point Phase alai iya nyuaka plak raban strategik Kenyalang Gold Card (KGC).
Ku iya, Klinik Jaya Medik bisi meri 5 ngagai 10 peratus diskaun produk enggau servis sida.
Iya mega madah, orang ke bisi KGC di Miri ulih ngembuan mayuh macham pengelebih ke diberi 67 raban strategik ba sitak Miri enggau 578 raban strategik di selampur Sarawak.
Sama bela datai, Sapit Menteri Pemansang Indu, Nembiak Mit enggau Pengelantang Komuniti ke mega Kaban Kunsil Nengeri (ADUN) Bekenu Datuk Rosey Yunus.-EDISI UKAS
