Sarawak Ngungkup RM500 Juta Dikena Ngaga Skim Entali Ai Umai Taun Siti
Disiarkan pada 03 Jul 2024
Sumber Berita: UKAS
KUCHING: Perintah Sarawak udah ngungkupka belanja RM500 juta dikena ngaga skim entali ai umai ba taun ke deka datai.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, projek nya deka digaga di Sri Aman, Samarahan enggau Kuching.
"Kitai udah baum lalu besetuju ngungkupka belanja RM500 juta.
"Tu enda nyengkaum ba endur bukai ti bela ulih dipeda digagaka projek ke sebaka baka di Limbang enggau Lawas kelimpah umai mit enggi rayat mayuh," ku iya madah.
Iya madahka pekara nya maya Pengerami Makai Lemai DCCI-KCCI Gawai Kaamatan ditu, Hari Dua.
Nambahka jaku iya, Datuk Patinggi Abang Zohari mega madah, keterubah iya minta belanja nya ari Perintah Besai tang nyentuk ke diatu agi nganti pemutus.
"Maya aku madah endur tu begunaka RM1 bilion, Menteri madah kelalu mayuh. Udah nya aku madah ngagai sida nama kebuah kitai enda magi dua, aku meri RM500 juta, kita meri RM500 juta.
"Tang nyentuk sehari tu, kitai agi nganti. Sarawak dulu agi meri RM500 juta," pia ku iya nerang.
Bela datai maya nya bini iya Puan Sri Datuk Amar Juma’ani Tun Tuanku Bujang, Sapit Premier Sarawak Datuk Amar Douglas Uggah Embas, Sapit Kepala Menteri Sabah Datuk Seri Panglima Dr Joachim Gunsalam, Menteri Penyerakup Bansa Dato Sri Aaron Ago Dagang, Menteri Kereja Raya Dato Sri Alexander Nanta Linggi, Presiden Balai Dagang enggau Industri Dayak (DCCI), Dato Allan Keripin Nangkai enggau Presiden Balai Dagang Enggau Industri Kadazandusun (KCCI), Datuk Ladislaus Maluda.-EDISI UKAS
