KUCHING: Opis Menteri Kuasa enggau Pemeruan Rampa Menua (MEESty) besaup enggau Malaysia Bioeconomy Development Corporation Sdn Bhd (MBDC) ba tuju nyungkak bidang biokuasa.
Sapit Menteri ba opis menteri nya, Datuk Dr Hazland Abang Hipni udah nerima penemuai basa ari Malaysian Bioeconomy Development Corporation Sdn Bhd (MBDC), empai lama tu tadi.
Penemuai basa nya betuaika Soeraya Satem Ahmad ngembuan tuju deka nambah enggau manah sereta meri penerang bekaul enggau tanggungpengawa MBDC ba baruh Opis Menteri Sains enggau Teknologi Malaysia (MOSTI).
Ba pekara nya, Datuk Dr Hazland madah, bisi berapa pekara udah dirintai MBDC kaul kerejasama enggau MEESty ti deka nyungkak pemanah teknologi gadung lebih agi ba bidang biokuasa.
Ku iya, penerang ke diberi MBDC maya aum nya lebih agi ngemerat bidang biokuasa dikena ngulihka penerang pemadu baru bekaul pemansang bidang kuasa di Sarawak.
MBDC mega udah bejuraika berapa iti geran ke udah disedia MOSTI ngagai kompeni bekaul pengawa mansik enggau pemansang.
Ba pekara tu mega, MOSTI nengah MBDC bela udah nyediaka geran dikena pengawa pemansang enggau mansik silik agi .
Sebagi ari geran ke udah dirintai iya nya Applied Innovation Fund beungkus RM500,000, Technology Development Fund 1 (RM1 juta), Technology Development Fund 2 (RM 3 juta), Bridging Fund (BGF) (RM 5 juta) enggau Strategic Research Fund (SRF) - APP (RM15 juta).-EDISI UKAS
