KUCHING: Opis Pemansang Koridor Kandang Menua (RECODA) udah nerima basa nengah projek pemun Setipikit Ngatur Pengawa Nyeliah Penyalah Makai Suap (ABMS) ba tuju ngelaban penyalah makai suap.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, basa nya deka meri pengandal ngagai pemeranak puku enggau rayat di nengeri tu empu ba ulah integriti enggau pengelurus ngatur pengawa agensi perintah.
"Tu sebagi ari pemeras kitai ngelawa juluk ati ba taun 2023 ti ngemeranka pemanah ngatur pengawa.
"Enggau tu, kitai udah datai ba siti agi tikas pemujur lalu nama ke beguna agi iya nya sistem nya endang udah bisi dikembuan kitai," ku iya.
Iya bejaku munyi nya maya nerima setipikit nya ari Tuai Eksekutif RECODA, Datu Ismawi Ismuni ba opis iya di Wisma Bapa Malaysia ditu, Hari Lima.
Datuk Patinggi Tan Sri Abang Zohari ke mega Chairman RECODA madah, sebagi ari agensi bekaul ke bukai ba projek pemun tu iya nya Opis Premier Sarawak, Opis Menteri Dagang Temuai, Industri Kreatif enggau Seni Pemerindang Sarawak (MTCP), Opis Kampung Sarawak, Perbadanan Perhutanan Sarawak enggau Opis Pekara Pengelantang Islam Sarawak (JAIS).
Berebak enggau nya iya mega meri jaku puji ngagai pemujur ke udah ditempa RECODA nya ti bela mandangka ulah integriti ba pengawa napi penyalah makai suap.
Bela datai maya nya Sapit Premier Sarawak Datuk Amar Douglas Uggah Embas, Menteri Kereja Raya Dato Sri Alexander Nanta Linggi, Sekretari Perintah Sarawak Datuk Amar Mohamad Abu Bakar Marzuki enggau Sapit Menteri ba Opis Premier Sarawak (Integriti enggau Ombudsman) Datuk Dr Juanda Jaya. -EDISI UKAS
