BELAGA: Peranak Punan Ba, Belaga diatu berasai lantang ati udah Perintah Besai ngungkupka belanja dikena nganti bateri solar hibrid enggau nyambung grid karan menua pesisir di menua sida.

Sapit Menteri Besai Datuk Patinggi Dr. Ahmad Zahid Hamidi madah, agih belanja projek nya mungkur RM4.2 juta dikena nganti bateri solar hibrid lalu RM62 juta agi ungkup projek karan menua pesisir.

Ku iya, pengawa ngaga sistem solar hibrid deka diadu sereta diatur Sarawak Energy Berhad (SEB).

"Ngarapka dua iti projek tu mai pengelantang ngagai rayat di menua tu," ku iya madah.

Iya madahka pekara nya ba aum media udah bejadika Projek Solar Hibrid enggau Pengerami Pemesai Begulai enggau Rayat di Rumah Brain Mering, Punan Ba, Belaga ditu, Hari Satu.

Bela datai maya nya Sapit Menteri Digital Datuk Wilson Ugak Kumbong, Sapit Menteri Utiliti enggau Telekomunikesyen Sarawak (Telekomunikesyen) Datuk Liwan Lagang, Senator Michael Mujah Lihan, Residen Sitak Kapit Galong Luang, Temenggong Ajang Sirek, Tuai Genturung Menua Punan Ba Brain Mering sereta bala bukai.

Ba pekara bukai, iya ke mega Menteri Pemansang Genturung Pendiau enggau Kandang Menua madahka diri deka beratika projek ngaga jalai ari Punan Ba ngelawa Simpang Samling, 20 kilometer pemanjai.

Kelimpah ari nya ku iya, beberapa iti projek pemansang ke bukai baka loji ai beresi digaga di Punan Ba deka dipasukka ba Bajet Menua 2025.

"Projek ke bukai nyengkaum ngaduka Opis Pemansang Mensia Mayuh (KEMAS) enggau Tabikas KEMAS Punan Ba sereta projek jematan baru ungkup rayat ditu enggau bala nembiak sekula bela deka dipasukka ba bajet nya," pia ku iya.

Ba aum media nya mega, Datuk Patinggi Ahmad Zahid madah, iya deka berandau enggau Menteri Kereja Raya Dato Sri Alexander Nanta Linggi bekaul pengawa ngaduka jalai ngena Projek Jiwa Murni di Sarawak ke udah jai ketegal ditengah lori batang.

Ba pengujung program, iya bela dipebasa bejadika pengawa ngelai nyuaka kunchi Program Rumah Rayat Seranta (PPRT) enggau ngabas jematan gantung Punan Ba. -EDISI UKAS