SIBU: Hospital Sibu udah nerima pemeri 185 mesin berubat enggau perengkaguna pengerai ari Kelab Rotary Bintulu Central (RCBC) enggau The Church of Jesus Christ of Latter-Day Saints.
Chairman Hospital Sibu Dr Nanthakumar Thirunavukkarasu madah, pemeri ke beungkus RM486,000 nya datai ari projek ‘Delivery Hope, Touching More Lives’.
“Hospital Sibu endang beguna bendar perengkaguna tu dikena meri servis pengerai datai ba tikas optimum ngagai mensia mayuh.
“Tuju pemeri tu bela mai pengelantang ngagai pesakit enggau orang gawa lalu ngarapka tu ulih meransang sida gawa enggau manah agi,” ku iya.
Iya nerangka pekara nya maya bejaku ba Pengerami Nyuaka Pemeri ari RCBC ba Hospital Sibu, Hari Empat tu tadi.
Iya mega madah, pemeri tu nyengkaum mesin berubat “electrocardio scanner”, “electrocardio scanner”, “keratometer/refractometer”, “gastroscope”, “transport incubator” enggau perengkaguna ke bukai baka 'aircond' kipas enggau ke bukai.
Dr Nanthakumar mega nambah, RCBC kala nyua pemeri baka Perengkaguna Ngelindung Diri (KPD) maya penyakit COVID-19 ti beguna nulung nyeliah ‘virus’.
Sama bela datai maya nya, Presiden RCBC Allen Wong Ching Seng enggau pengari ari The Church of Jesus Christ of Latter-Day Saints Elder Brad Douglas sereta Sister Marsha Douglas. -EDISI UKAS
