Perintah Sarawak Ngemendar RM25 Juta, Numbuh Palan Penyulut Digital Baru Universiti Curtin Malaysia Di Miri
Disiarkan pada 30 Jun 2024
Sumber Berita: UKAS
MIRI: Perintah Sarawak ngemendarka agih belanja sepenyampau RM25 juta dikena numbuhka Palan Penyulut Digital ke baru, Universiti Curtin Malaysia, di Miri.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ari pemisi palan penyulut ke baru nya ila, deka ulih matak mayuh agi nembiak ari menua luar belajar ba palan pelajar tinggi.
Ku iya, kandang diatu palan pelajar tinggi nya ukai semina endur bala nembiak ari Sarawak aja, tang mega nerima bala nembiak ari menua Asia ke bukai.
“Ba awak ke sama, pelajar tempatan ulih sama enggau pelajar ba luar menua, ba dia sida ulih belajar bejaku Bahasa Inggeris sereta ngulih peneleba ba kampus tu.
“Enggau tu, aku bearap Palan Penyulut Digital ke baru tu nyengkaum pengawa Injinir, Kuasa, Kecerdasan Buatan (AI) enggau Palan Data ke ulih marit pelajar ari luar menua ngambika ulih nyerungkai penemu baru ba ditu nyengkaum bakih ari Asean Timur,”ku iya.
Iya madah munyi nya maya bejaku ba Pengerami Makai Lemai Gala Genap Taun Ke-25 Universiti Curtin di Hotel Pullman, kena Hari Enam .
Berebak enggau nya, Datuk Patinggi Abang Zohari nambah baru, nembik ke ada ba Sarawak chukup betuah laban perintah nengeri udah nyendiaka pelajar pechuma ba Taun 2026.
“Inisiatif ke deka diberi ngagai 25,000 nembiak ke deka nampung pelajar tikas tinggi chukup manah, nadai penanggul bekaul belanja kena sida nampung belajar,” ku iya agi.
Sama datai Menteri Pengangkut Sarawak, Dato Sri Lee Kim Shin , Sekretari Perintah Sarawak, Datuk Amar Mohamad Abu Bakar Marzuki, Mantan Sapit Tuai Menteri Sarawak ke mega Pro-Canselor, Universiti Curtin, Datuk Patinggi Tan Sri Dr George Chan Hong Nam, Mandal Canselor Universiti Curtin, Professor Harlene Hayne, Sapit Menteri Dagang Temuai, Kreatif enggau Seni Pemerindang, Datuk Sebastian Ting Chiew Yew, Sapit Menteri Pelajar, Inovasyen enggau Pemansang Pengelandik Sarawak, Datuk Dr. Annuar Rapaee sereta bala bukai.-EDISI UKAS
