BANDAR SERI BEGAWAN: Ripih peturun asal Yang di-Pertua Nengeri Sarawak, Tun Pehin Sri Dr Wan Junaidi Tuanku Jaafar lebih 200 taun udah diserah ngagai Palan Sejarah Brunei nyadika malin enggau dikena pengawa mansik, kena Hari Dua.
Pengawa nyerahka salin ripih peturun nya udah dipenyadi Tun Pehin Sri Dr Wan Junaidi enggau Sekretari Mendam Opis Menteri Main Asal, Nembiak enggau Lumba Brunei, Pengiran Mohd Hasnan Pengiran Ali Hassan maya nemuai ngagai palan nya.
Nitihka ripih asal peturun nya ngenukuka Tun Pehin Sri Dr Wan Junaidi ba tubuh serak ke-38 ari purih Nabi Muhammad.
Sebedau nya, udah datai dia begulai enggau bini iya, Toh Puan fauziah Mohd Sanusi ba Palan Sejarah Brunei pukul 10 pagi , Tun Pehin Sri Dr Wan Junaidi enggau bala bukai iya dibaik ngagai Balai Pemandang Ripih Peturun ti mega mandangka ripih bukai bekaul sejarah Brunei Darussalam.
Pegawai Palan Sejarah Brunei udah nerangka pansik enggau ripih peturun sereta sejarah peturun indai Yang di-Pertua Sarawak iya nya Sharifah Hanifah ti dipadah asal ari peturun Al Aiydrus ari ripih Faqih Muqqaddam baka rikod asal ditulis pemansik Palan Sejarah Brunei, Jamil Al-Sufri.
Ba rikod nya bisi nyebut peturun Hussein Bin Abdul Abdul Kadir ti ditampung ngagai Al Aiydeus nya ke alai Hussein tu mega bala sepiak indai iya.
Pekara ti narit ati nya, naka diatu ripih peturun indai Tun Pehin Sri Dr Wan Junaidi bedau genap lalu pansik silik deka dipejalai ngambi tetemuka pekara baru nyadika malin pengawa mansik.
Asil pansik ti dipejalai, tetemuka ripih peturun apai Tun Pehin Sri Dr Wan Junaidi asal peturun Sayid Yassin Al-Yahya ari Terengganu, Sayyid Agil ari Banting, Sarawak, Sayyid Muhammad, Sayyid Hamid, Sayyid Zainal Abidin enggau Tuanku Hassan.
Sepengudah ngabas Palan Sejarah Brunei, Tun Pehin Sri Dr Wan Junaidi sereta bini nimpai pemanah sejarah Sungai Brunei.
Tun Pehin Sri Dr Wan Junaidi enggau bini mupuk pulai ke Kuching pukul 3 lemai, Hari Dua.-EDISI UKAS
