KUCHING: Inisiatif Opis Akim Syariah Sarawak negapka kuasa Kort Syariah nerima sukung Tuai Pemegai Menua Nengeri Sarawak, Tun Pehin Sri Dr Wan Junaidi Tuanku Jaafar.
Tuai Akim Syarie Opis Akim Syariah Sarawak, Datu Awang Suhaili Ledi madah, nya ulih diperati lebuh Tun Pehin Sri Dr Wan Junaidi bela bekunsika perambu negapka Kort Syariah ari konteks undang-undang.
Ku Iya, pengawa nyiri Tun Pehin Sri Dr Wan Junaidi nyadi Tuai Pemegai Menua Nengeri Sarawak deka mandangka pengawa nampung agenda negapka Undang-Undang Syariah.
“Tuju kitai madah ngagai Tun Pehin Sri Dr Wan Junaidi bekaul pengawa organisasyen, pengawa akim Sarawak di baruh kuasa Tun.
“Nangkan nya, Tun Pehin Sri Dr Wan Junaidi mega bekunsika peneleba diri lalu meri sadang penemu dikena negapka Kort Syariah ari konteks pekara undang-udang nyengkaum ngemanahka undang-undang, institusi akim, protokol, komiti enggau chara negapka undang-undang, Kort Syariah tu lengkas diadu,” ku iya.
Iya bejaku munyi nya lebuh dirandau pemberita pengudah ngatur penemuai basa ngagai Tun Pehin Sri Dr Wan Junaidi sereta bini, Toh Puan Fauziah Mohd Sanusi di Astana Nengeri Sarawak kena Hari Empat.
Datu Awang Suhaili madah baru, batang tuju penemuai nya deka madah pasal status pemadu baru Kort Syariah ke alai pengawa nyiri bala akim endang di baruh kuasa Tun Pehin Sri Dr Wan Junaidi.
Iya madah, randau nya mega dikena ngangauka Tun Pehin Sri Dr Wan Junaidi sereta Toh Puan Fauziah nyadi temuai dipebasa ba program pertauliahan diatur enda lama da.-EDISI UKAS
