BANDAR SERI BEGAWAN: Penyampau dagang dirikodka Sarawak enggau Brunei Darussalam ba taun 2023 manggai RM3.76 bilion.

Sapit Premier Sarawak, Datuk Amar Awang Tengah Ali Hasan madah, penyampau nya nambah 23.8 peratus enti dibanding enggau RM3.04 bilion taun 2022 suba.

"Kitai andal kerejasama ke manah Sarawak enggau Brunei deka nyungkak penyampau dagang.

"Nya alai, kitai chakah deka ngemujur sereta ngemuntang pengawa dagang Brunei enggau Sarawak lebih agi nengah ekspo dagang," ku iya madah.

Iya bejaku munyi nya maya Pengerami Makai Lemai Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau Toh Puan Fauziah Mohd Sanusi Begulai enggau Diaspora Sarawak ba Opis Suruhanjaya Tinggi Malaysia ke Brunei Darussalam ditu, lemai Hari Minggu.

Ba pekara bukai, Datuk Amar Awang Tengah madah, Perintah Sarawak benung ngaga Jalai Besai Nebing Tasik Utara (NCH).

Ku iya, projek nya mega deka nyungkak dagang enggau pengawa beranakka puku Brunei enggau Sarawak.

"Perintah Sarawak mega deka negapka kerejasama ba pekara telekomunikesyen ba tuju nyendiaka servis penyambung ba pintu penama entara menua," ku iya madah baru.

Dulu ari nya, Kuasa Usaha Sementara, Suruhanjaya Tinggi Malaysia ke Brunei Darussalam, Nur Ezira Mahadi madah, ba taun 2023, Brunei nyadi bakih dagang global ke-30 pemadu besai Malaysia enggau penyampau dagang dua buah menua nyauka manggai RM10 bilion.

Kelimpah ari nya iya mega madah, Suruhanjaya Tinggi Malaysia di Bandar Seri Begawan bela ngelaluka pengawa muka Opis Dagang enggau Dagang Temuai Sarawak Brunei (STATOB) taun tu ti dipeda ulih negapka agi kerejasama Brunei enggau Sarawak. -EDISI UKAS